قىتايداعى بەلگىسىز ۆيرۋس انىقتالدى
نۇر-سۇلتان. قازاقپارات - ماماندار بەلگىسىز دەرتتىڭ قانداي ۆيرۋستىڭ تۇرىنە جاتاتىنىن انىقتادى.
ەلىمىزدىڭ سانيتار-دارىگەرلەرى قىتايعا جولى تۇسكەن ازاماتتارعا رەسپيراتورلىق ينفەكسيالاردىڭ الدىن الۋ شارالارىن قاپەردەن شىعارماۋعا شاقىرادى. قىتايلىق دارىگەرلەر حۋبەي پروۆينسياسىنا قاراستى ۋحان قالاسىندا تاراپ جاتقان پنيەۆمونيا اۋرۋىنىڭ بەلگىسىز ءتۇرى كوروناۆيرۋستىڭ جاڭا تۇرىنە جاتاتىنىن انىقتادى، دەپ حابارلايدى Sputnik.
ماماندار ۆيرۋستىڭ جاڭا ءتۇرى ادامنان ادامعا جۇقپايتىنىن اتاپ ءوتتى. ولاردىڭ بولجامىنشا، اۋرۋعا شالدىققاندار دەرتتى مال جانە شيكى تەڭىز ونىمدەرىن جەۋ ارقىلى جۇقتىرۋى مۇمكىن.
ايتا كەتەيىك، وسىعان دەيىن قىتايدىڭ حۋبەي پروۆينسياسىنا قاراستى ۋحان قالاسىندا پنيەۆمونيا اۋرۋىنىڭ بەلگىسىز ءتۇرى تاراپ جاتقانى حابارلاعان بولاتىن. وتكەن جىلدىڭ جەلتوقسان ايىندا قاۋىپتى دەرتتى 27 ادام جۇقتىرعان. ال 2020 -جىلدىڭ 5-قاڭتارىنداعى مالىمەتكە سايكەس، اۋرۋدى جۇقتىرعانداردىڭ سانى 59 عا ءوستى. ادام ءولىمى تىركەلمەگەن.
ەلىمىزدىڭ سانيتار-دارىگەرلەرى قىتايعا جولى تۇسكەن ازاماتتارعا رەسپيراتورلىق ينفەكسيالاردىڭ الدىن الۋ شارالارىن قاپەردەن شىعارماۋعا شاقىرادى. حۋبەي پروۆينسياسىنا قازاقستاننان تىكەلەي اۋە رەيستەرى جوق.
