ەردوعان مەن پۋتين «تۇرىك اعىسى» جوباسىن ىسكە قوستى، تاياۋ شىعىستاعى جاعدايدى تالقىلادى

بۇل جوبا رەسەي گازىن جاڭا باعىت بويىنشا تۇركيا مەن ەۋروپاعا جەتكىزۋى ءتيىس.

«تۇرىك اعىسى» - ماسكەۋدىڭ ۋكراينا اۋماعى ارقىلى گاز تاسىمالداۋدى ازايتۋ ماقساتىندا جۇزەگە اسىرعان جوباسى. گاز قۇبىرىنىڭ قۇرىلىسى 2017-جىلى مامىر ايىندا باستالعان، وعان شامامەن 8 ميلليارد دوللار جۇمسالعان.

اشىلۋ راسىمىندە سويلەگەن پۋتين تۇركيا مەن رەسەي «ەكى مەملەكەت پەن ەۋروپا، تۇتاس الەم حالقى يگىلىگى ءۇشىن ءوزارا قارىم-قاتىناس پەن ارىپتەستىكتىڭ ۇلگىسىن» كورسەتىپ وتىر دەدى.

گاز قۇبىرىنىڭ ۇزىندىعى - 930 شاقىرىمنان استام، قارا تەڭىزىنىڭ تابانى ارقىلى وتەدى. ول جىل سايىن رەسەيدەن تۇركيانىڭ باتىسىنا 31,5 ميلليارد تەكشە مەتر گاز تاسىمالداۋى ءتيىس. ونىڭ جارتىسى بالقان مەن ورتالىق ەۋروپا (بولگاريا، سەربيا، ۆەنگريا دا بار) ەلدەرىنە كەتەدى.

ستامبۋلدا وتكەن جوبانىڭ اشىلۋ سالتاناتىنا سەربيا مەن بولگاريا باسشىلارى دا قاتىستى.

5- قاڭتاردا بولگاريانىڭ گاز وپەراتورى «بۋلگار ترانس گاز» كومپانياسى رەسەيدىڭ گاز تاسىمالداي باستاعانىن حابارلادى. تەرمينال بولگاريامەن شەكارادان شامامەن 20 شاقىرىم جەردەگى تۇركيانىڭ كيك ەلدى مەكەنىندە ورنالاسقان.

اشىلۋ سالتاناتىندا سويلەگەن ەردوعان تاياۋ شىعىستاعى جاعدايدى تالقىلاپ، يران مەن ا ق ش اراسىنداعى احۋال «كۇردەلى كەزەڭگە» جەتتى دەگەن.

اشىلۋ الدىندا پۋتين مەن ەردوعان اقپارات قۇرالدارىنىڭ قاتىسۋىنسىز وڭاشا فورماتتا كەزدەستى. بۇعان دەيىن كرەملدىڭ باسپا ءسوز قىزمەتى پۋتين تۇركيا باسشىسىمەن سيريا مەن ليۆياداعى جاعداي، ەكى مەملەكەت اراسىنداعى ەكونوميكالىق قاتىناستىڭ بارىسىن تالقىلايدى دەپ مالىمدەگەن. ال ەردوعان كەزدەسۋ بارىسىندا يدليبتەگى جاعداي مەن رەسەي-تۇركيا اراسىنداعى سيرياعا بايلانىستى كەلىسىمنىڭ ورىندالۋ ماسەلەسى ءسوز بولادى دەگەن.

«ازاتتىق»