لاس ۆەگاستاعى كورمەدە «جاساندى ادامدار» تانىستىرىلدى

 قازاقپارات جاڭا تەحنولوگيالار كورمەسىندە كورەرمەن نازارىنا ۇسىنىلعان جاڭالىقتارعا شولۋىن ۇسىنادى.

جاساندى Neon ادامى

Neon - ينتەرنەت جوق كەزدە ديالوگتا قالا الاتىن جاساندى ادام. جوبانى ونىپراناۆ مينستري باسقاراتىن Advanced Research Lab (STAR Labs)  كومپانياسى مەن Samsung Technology جاساپ جاتىر. جوبانىڭ ماقساتى - ادامنىڭ بەينەسى مەن ءىس- ارەكەتىن قايتالاي الاتىن جاساندى تۇلعا جاساۋ. نەوندارمەن سويلەسۋگە بولادى، ءبىراق ولار پايدالى اقپارات بەرە المايدى.

ولار مۇعالىمدەردى، تەلەۆيزيالىق باعدارلاما جۇرگىزۋشىلەرى مەن قارجى كەڭەسشىلەرىن الماستىرا الادى.

Ballie اقىلدى روبوتى

Ballie روبوتى - بەينەتاسپاسى بار كىشىگىرىم شار. ول كەز- كەلگەن جاعدايدا اقىلدى تەحنيكامەن بايلانىسا الادى. ەگەر ۇيدەگى ءيت جەرگە تاماق توگىپ قويسا، روبوت شاڭسورعىشتى ىسكە قوسادى. ۇيىقتايتىن ۋاقىت جەتكەندە «اقىلدى» پەردەلەردى جاۋىپ، شامداردى سوندىرەدى. Ballie- ءدىڭ شىعۋ ۋاقىتى مەن باعاسى ايتىلعان جوق.

AR- كوزىلدىرىگى

سونىمەن قاتار، كورمەدە Samsung كومپانياسى قىزىقتى گادجەت - AR- كوزىلدىرىگىن تانىستىردى. وتكەن جىلى تانىستىرىلعان GEMS ەكزوسكەلەتىمەن بىرىگىپ كوزىلدىرىك يەسىنە جەكە جاتتىقتىرۋشىمەن فيتنەسپەن اينالىسۋعا مۇمكىندىك بەرەدى. كومپانيا AR- كوزىلدىرىكتىڭ دە ساتىلىمعا شىعاتىن ۋاقىتى مەن باعاسىن جاريالامادى.

كۆانتتىق بۇزۋدان قورعالعان الەمدەگى العاشقى اۆتوكولىك

ISARA كانادالىق كومپانياسى تانىستىرعان Karma Revero GT اۆتوكولىگى ەلەكتروندىق دىبىستىق مالىمەتتەردى جىبەرىپ جانە قابىلداي الادى. سونىمەن بىرگە، اقپارات باسقا بىرەۋگە ءمالىم بولۋى مۇمكىن دەپ الاڭدامايسىز، ءتىپتى مالىمەتىڭىزدى كۆانتتىق كومپيۋتەردى پايدالانىپ تا ەشكىم اشا المايدى.

Karma Revero GT ەلەكتروموبيلىن تانىستىرۋ ماقساتىندا جاسالعان ۇلگىگە ISARA Catalyst TLS سىناق ستەندى سەكىلدى قولجەتىمدى ونىمدەر پايدالانىلعان. ولار Netpeople iNAGO جۇرگىزۋشى كومەكشىسىنىڭ پلاتفورماسىندا ءقاۋىپسىز بايلانىس جاساۋعا مۇمكىندىك بەرەدى.

قوس ەكرانى بار نوۋتبۋك

ASUS كومپانياسى كورمە اياسىندا ءوز كلاسىنداعىلاردان ىقشامدىلىعى، جىڭىشكەلىگى جانە قۋاتتىلىعىمەن ەرەكشەلەنەتىن 14 ديۋيمدى ZenBook Duo-نى تانىستىردى.

جاڭا ZenBook Duo بارلىق پارامەترلەر بويىنشا ارزان ءارى قولدانۋعا جەڭىل. 4K OLED- ديسپلەيدىڭ ورنىنا Full HD IPS- ماتريتسانى قويعان. نوۋتبۋك 16 گ ب جادى بار Intel Core ونىنشى بۋىن پروتسەسسورلارىندا قولجەتىمدى. سونىمەن قاتار، NVIDIA MX250 ديسكرەتتىك بەينەكارتاسى بار.

ەكىنشى 12,6 ديۋيمدىك ديسپلەيدى ەكىنشى مونيتور رەتىندە قولدانۋ مۇمكىندىگى بار. وندا جۇمىس ىستەۋگە قاجەتتى قوسىمشا تەرەزەلەردى اشىپ قويۋعا، ويىندارعا قوسالقى اقپارات ىزدەۋگە نەمەسە ءجاي عانا YouTube-تان ۆيدەو قوسىپ قويۋعا بولادى.

ايتا كەتەيىك،  CES (Consumer Electronics Show) - جاڭا گادجەتتەردىڭ، ەلەكترونيكانىڭ، تەحنيكانىڭ، اۆتوكولىكتەردىڭ جانە باسقا دا قۇرىلعىلاردىڭ جىل سايىن وتكىزىلەتىن ءداستۇرلى كورمەسى. كورمەدە بىزگە جوعارى ساپالى تەلەديدارلاردى، جىلدام درونداردى، وزدىگىنەن جۇرەتىن الۋان ءتۇرلى كولىك تۇرلەرىن جانە ت. ب. جاڭاشا قۇرىلعىلاردى ۇسىنادى.

جاڭا تەحنولوگيالار كورمەسى 10 - قاڭتارعا دەيىن جالعاسادى.

اۆتور بالنۇر قوجاگەلدى