جاڭا جىلدان باستاپ جول ەرەجەسىن بۇزعاندارعا قاتىستى ايىپپۇل مولشەرى قالاي ءوستى؟

وسى ورايدا نۇرفين جوباسى جۇرگىزۋشىلەردى، جاياۋ جۇرگىنشىلەر مەن جول قوزعالىسىنىڭ باسقا دا قاتىسۋشىلارىن جاڭارتىلعان ايىپپۇل سومالارىمەن تانىستىرۋدى ءجون كوردى.

جول قوزعالىسى ەرەجەلەرىن بۇزعاندار ءۇشىن ايىپپۇلداردىڭ بىرنەشە ونداعان ءتۇرى قاراستىرىلعان. ءبىز ەڭ كەڭ تاراعان بۇزۋشىلىق تۇرلەرىنە توقتالىپ، ولار ءۇشىن بەلگىلەنگەن ايىپپۇلداردىڭ قانشا ەسە وسكەنىن ەسەپتەدىك. ايىپپۇلدار سوماسى 2651 تەڭگەدەن باستالىپ، 53000 تەڭگەگە دەيىن جانە ودان جوعارى بولىپ بەلگىلەنگەن. ەڭ كەڭ تاراعان ايىپپۇل مولشەرى - 13255 تەڭگە.

بۇزۋشىلىقتار مەن ايىپپۇلدار كولەمى

جولدا ءجۇرىپ بارا جاتىپ، ۇيالى تەلەفونمەن سويلەسكەن جانە ونى قولدانعان جۇرگىزۋشىگە 5 ا ە ك نەمەسە 13255 تەڭگە كولەمىندە ايىپپۇل سالىنادى. وتكەن جىلمەن سالىستىرعاندا ايىپپۇل مولشەرى 600 تەڭگەگە قىمباتتاعان.

ەگەر اۆتوكولىك جىلدامدىعى جول ۋچاسكەسىندە بەلگىلەنگەن جىلدامدىق مولشەرىنەن ساعاتىنا 10-20 شاقىرىمعا جوعارى بولسا، ول ءۇشىن دە 5 ا ە ك - 13255 تەڭگە كولەمىندە ايىپپۇل قاراستىرىلعان.

ال جىلدامدىقتى ساعاتىنا 20-40 شاقىرىمعا ارتتىرعان جۇرگىزۋشىگە 10 ا ە ك - 26510 تەڭگە ايىپپۇل سالىنادى. بۇل 2019-جىلمەن سالىستىرعاندا 1260 تەڭگەگە كوپ.

سونداي-اق جىلدامدىقتى ساعاتىنا 40 شاقىرىم جانە ودان ارى ارتتىرعان ءۇشىن 20 ا ە ك - 53020 تەڭگە ايىپپۇل سالىنادى. بۇل وتكەن جىلمەن سالىستىرعاندا 2520 تەڭگەگە وسكەن.

قاۋىپسىزدىك بەلبەۋىن تاقپاعان نەمەسە موتوشلەم كيمەگەن جۇرىزۋشىگە 5 ا ە ك - 13255 تەڭگە كولەمىندە ايىپپۇل قاراستىرىلعان.

كەپتەلىس كەزىندە كوشەنىڭ قيىلىسىنا شىعىپ، جۇرگىزۋشىلەرگە كەدەرگى كەلتىرگەن ءۇشىن ايىپپۇل كولەمى - 3 ا ە ك نەمەسە 7953 تەڭگە. وتكەن جىلمەن سالىستىرعاندا بۇل ايىپپۇلدىڭ سوماسى 400 تەڭگەگە وسكەن.

ال جول ۇستىندە توقتاپ، كەپتەلىستىڭ پايدا بولۋىنا سەبەپكەر بولعان جۇرگىزۋشىلەر 10 ا ە ك - 26510 تەڭگە ايىپپۇلمەن جازالانادى.

باسقا جولاققا اۋىسۋ، اينالۋ نەمەسە توقتاۋ كەزىندە سايكەسىنشە بۇرىلۋ نەمەسە توقتاۋ بەلگىسى سەكىلدى ەسكەرتۋ بەلگىلەرىن بەرمەگەن جۇرگىزۋشىلەرگە 5 ا ە ك - 13255 تەڭگە ايىپپۇل سالىنادى.

تىيىم سالىنعان جەردە كولىكپەن ارتقا جۇرگەن ءۇشىن 10 ا ە ك - 26510 تەڭگە ايىپپۇل قاراستىرىلعان.

ال جاياۋ جۇرگىنشىلەر جولى مەن جول جيەگىندەگى كولىك قوزعالىسى ءۇشىن 15 ا ە ك - 39765 تەڭگە كولەمىندە ايىپپۇل سالىنادى. بۇل وتكەن جىلمەن سالىستىرعاندا 2000 تەڭگەگە ارتقان.

سونداي-اق جاياۋ جۇرگىنشىلەر ايماعىندا، گۇلزارلار، بالالارعا ارنالعان جانە سپورتتىق الاڭداردا كولىكپەن توقتاعان نەمەسە كولىكتى قالدىرعان جاعدايدا 10 ا ە ك - 26510 تەڭگە ايىپپۇل قاراستىرىلعان.

ءدال وسى مولشەردەگى ايىپپۇل، 10 ا ە ك - 26510 تەڭگە سايكەس كۋالىگى بولماي، مۇگەدەكتەرگە ارنالعان تۇراققا اۆتوكولىگىن قويعان جۇرگىزۋشىلەرگە دە سالىنادى.

ال اقىلى كولىك تۇراعىنا اقشا تولەمەي كەتكەن جۇرگىزۋشىلەر 3 ا ە ك - 7953 تەڭگە ايىپپۇل تولەيدى. بۇل ەلىمىزدىڭ ءىرى قالالارىنداعى كولىك تۇراقتارىنا قاتىستى.

سونداي-اق بەلگىلەنگەن ۋچاسكەلەردە كۇندىزگى ۋاقىتتا اۆتوكولىك شامىن جاقپاعانى ءۇشىن دە وسىنداي مولشەردە ايىپپۇل قاراستىرىلعان - 3 ا ە ك نەمەسە 7953 تەڭگە.

ال قاراڭعى مەزگىلدە كولىكتىڭ شامىن جاقپاعان جۇرگىزۋشىلەرگە 5 ا ە ك - 13255 تەڭگە ايىپپۇل سالىنادى.

جولدا اپاتتىق جاعداي تۋدىرعان ءۇشىن 10 ا ە ك - 26510 تەڭگە ايىپپۇل قاراستىرىلعان.

تەمىر جولدان ءوتۋ كەزىندە ەرەجە بۇزعان جۇرگىزۋشىلەر دە وسى مولشەردە - 10 ا ە ك نەمەسە 26510 تەڭگە ايىپپۇلمەن جازالانادى. بۇل - بەلگىلەنبەگەن جەردە تەمىر جولدان ءوتۋ، شلاگباۋم جابىق تۇرعاندا نەمەسە قوزعالىپ جاتقاندا، سونداي-اق وتۋگە تىيىم سالاتىن باعدارشام بەلگىسى كەزىندە تەمىر جولعا شىعۋ.

ەگەر جاياۋ جۇرگىنشى بەلگىلەنبەگەن جەردەن وتسە نەمەسە باسقا دا جول قوزعالىسى ەرەجەلەرىن بۇزسا، وعان 2 ا ە ك - 5302 تەڭگە ايىپپۇل سالىنادى. بىلتىرعى جىلمەن سالىستىرعاندا 150 تەڭگەگە وسكەن.

ال جاياۋ جۇرگىنشىنىڭ ماتەريالدىق شىعىنعا نەمەسە ادام دەنساۋلىعىنا زيان كەلتىرۋگە سوقتىرعان جول قوزعالىسى ەرەجەسىن بۇزۋى، قىلمىستىق سيپات بولماعان جاعدايدا 10 ا ە ك - 26510 تەڭگە ايىپپۇلمەن جازالانادى.

قوعامدىق كولىكتە تازالىق ساقتاماعان جانە قاۋىپسىزدىك ەرەجەلەرىن بۇزعان ءۇشىن 1 ا ە ك - 2651 تەڭگە ايىپپۇل قاراستىرىلعان. وتكەن جىلمەن سالىستىرعاندا 126 تەڭگەگە كوپ.

ال قوعامدىق كولىكتە جول ءجۇرۋ اقىسىن تولەۋدەن جالتارعاندار 2 ا ە ك - 5302 تەڭگە ايىپپۇلمەن جازالانادى. ايىپپۇل بىلتىرعى جىلمەن سالىستىرعاندا 250 تەڭگەگە وسكەن.

ەگەر ءبىر جول قوزعالىسى ەرەجەسىن قايتادان بۇزعان جاعدايدا ايىپپۇل كولەمى شامامەن ەكى ەسە ءوسۋى مۇمكىن.