ترامپ ا ق ش اسكەرىن شىعارعىسى كەلگەن يراكقا سەس كورسەتتى

بۇل مالىمدەمە ا ق ش اسكەرىن يراكتان شىعارۋ تۋرالى تالاپقا بايلانىستى ايتىلىپ وتىر.

«ونىڭ جانىندا يرانعا قارسى سانكسيالار باعداتقا ۇساق-تۇيەك بولىپ كورىنەدى» دەپ مالىمدەدى ترامپ جۋرناليستەرگە.

ونىڭ سوزىنشە، يراك ا ق ش سالىپ بەرگەن اۋە بازاسى ءۇشىن تولەم جاسامايىنشا، ا ق ش اسكەرى يراك اۋماعىنان شىقپايدى. «ونىڭ قۇرىلىسىنا ميللياردتاعان دوللار جۇمسالدى. ەگەر ولار بىزگە سونى تولەمەسە، ءبىز ەشقايدا كەتپەيمىز» دەدى ترامپ.

بۇعان دەيىن، 3- قاڭتاردا ا ق ش پرەزيدەنتىنىڭ بۇيرىعىمەن جۇرگىزىلگەن ارنايى وپەراتسيا ناتيجەسىندە باعدات اۋەجايىندا يران گەنەرالى كاسەم سۇلەيماني قازا تاپقان. وسىعان بايلانىستى يراك پارلامەنتى شۇعىل وتكىزگەن وتىرىسىندا قابىلداعان قاراردا ەل اۋماعىنان بارلىق شەتەلدىك اسكەردى الىپ كەتۋگە شاقىرعان.

يراك پارلامەنتى سونىمەن بىرگە ەل اۋماعىندا، تەڭىزدە جانە اۋە كەڭىستىگىندە شەتەل اسكەرىنىڭ قانداي دا بولماسىن كەز كەلگەن بەلسەندى ءىس-ارەكەتىنە تىيىم سالۋعا شاقىرعان.

قازىرگى كەزدە يراكتا ا ق ش- تىڭ بەس مىڭ ساربازى بار.

يراك ۇكىمەتى ەل اۋماعىنان ا ق ش اسكەرىن شىعارۋ شارالارىن ازىرلەۋگە كىرىسىپ كەتكەن.

ا ق ش مەملەكەتتىك دەپارتامەنتى يراك ۇكىمەتىن اسىعىس شەشىم قابىلداۋعا بارماس بۇرىن ابدەن ويلانۋعا شاقىرىپ، «يسلام مەملەكەتى» تەررورلىق توبىنا قارسى كۇرەستە ەكى ەل اراسىنداعى بەرىك ىنتىماقتاستىقتىڭ ماڭىزدىلىعىن اتاپ وتكەن. گەرمانيا، فرانسيا مەن ۇلى بريتانيا دا يراكتى وسى باعىت بويىنشا ارىپتەستىكتى جالعاستىرۋعا شاقىرعان.

يراننىڭ يسلام ساقشىلارى كورپۋسىنىڭ ارنايى ەليتالىق ءبولىمى - «قۇدس كۇشتەرىنىڭ» قولباسشىسى گەنەرال كاسەم سۇلەيماني 3- قاڭتار، جۇما كۇنى تاڭەرتەڭ باعدات اۋەجايىنا ۇشىپ كەلگەننەن كەيىن ا ق ش- تىڭ اۋە شابۋىلىنان قازا تاپقان. بۇل وپەراتسيا تۋرالى بۇيرىقتى ا ق ش پرەزيدەنتى دونالد ترامپ بەرگەن. وسىدان كەيىن تاياۋ شىعىستاعى جاعداي شيەلەنىسە باستادى دەپ حابارلايدى Reuters.

يران گەنەرالدىڭ قازاسى ءۇشىن ۆاشينگتوننان كەك قايتارۋعا ۋادە ەتتى. ا ق ش تاياۋ شىعىسقا قوسىمشا ءۇش مىڭعا جۋىق سارباز جونەلتۋ تۋرالى شەشىم قابىلدادى.

«ازاتتىق»