ب ۇ ۇ باس حاتشىسى گەوساياسي جاعدايدىڭ ۋشىعىپ تۇرعانىن مالىمدەدى
نۇر-سۇلتان. قازاقپارات – ب ۇ ۇ باس حاتشىسى گەوساياسي شيەلەنىس وسى عاسىرداعى ەڭ جوعارى دەڭگەيگە جەتكەندىكتەن، ەسكالاتسيانى توقتاتۋعا شاقىردى، دەپ حابارلايدى قازاقپارات ب ۇ ۇ سايتىنا سىلتەمە جاساپ.
ب ۇ ۇ باس حاتشىسى انتونيۋ گۋتتەريش دۇيسەنبى كۇنى گەوساياسي شيەلەنىس ەسكالاتسياسىن تومەندەتۋگە شاقىردى.
«جاڭا جىل ابىر-سابىردان باستالدى. ءبىز قاۋىپتى كەزەڭدە ءومىر ءسۇرىپ جاتىرمىز. ءتىپتى، يادرولىق قارۋسىزداندىرۋدىڭ دا وزىنەن-ءوزى قاجەتتىلىگى بولماي بارادى» دەي كەلە، ول يراكتا كاسەم سۋلەيمانيدىڭ ولتىرىلگەنىنە توقتالدى.
جەكسەنبى كۇنى يران ا ق ش- تان كەك الاتىنىن حابارلاعان بولاتىن، سونىمەن قاتار 2015-جىلدان بەرگى يادرولىق باعدارلاماعا قاتىسپايتىنىن مالىمدەگەن ەدى.
سونىمەن قاتار، گۋتەرريش سولتۇستىك كورەيانىڭ يادرولىق سىناقتارعا جاريالاعان موراتيريدەن باس تارتپاق شەشىمىنە دە الاڭداۋشىلىق ءبىلدىردى.
گۋتەرريش نيۋ-يوركتەگى ب ۇ ۇ ورتالىق كەڭسەسىندە جۋرناليستەرگە كوپتەگەن مەملەكەتتەر سالدارى بولجاۋعا دا كەلمەيتىن شەشىمدەر قابىلداپ جاتقانىن ايتتى. سونىمەن قاتار، ساۋدا جانە تەحنولوگيالىق شيەلەنىستەر دە الەمدىك نارىققا كەرى اسەر ەتىپ، تەڭسىزدىكتى ۇلعايتىپ جاتقانىن مالىمدەدى.
«ەسكالاتسيانى توقتاتىڭىزدار. سابىرلىق تانىتىپ، ديالوگقا كەلىڭىزدەر. حالىقارالىق كەلىسىمدى قايتا جانداندىرىڭىزدار. ەڭ كوپ زارداپ شەگەتىن - قاراپايىم حالىق. ءبىزدىڭ ورتاق مىندەت - بۇعان جول بەرمەۋ»، — دەدى ول.
