وزبەكستان تاجىكستانمەن شەكاراسىن مينادان تازارتتى
نۇر-سۇلتان. قازاقپارات - وزبەكستان تاجىكستانمەن شەكاراسىن مينادان تازارتىپ بولعانىن حابارلادى. بۇل تۋرالى تاجىكستان ۇكىمەتىنىڭ كۇش قۇرىلىمدارىنداعى دەرەككوزدەرىنە سۇيەنىپ، «ازيا پليۋس» جاڭالىقتار سايتى جازدى.
وزبەكستان پرەزيدەنتى شاۆكات ميرزيايەۆ 2018 -جىلى ناۋرىزدا تاجىكستانعا جاساعان ساپارىندا 2019 -جىلدىڭ سوڭىنا دەيىن وزبەك- تاجىك شەكاراسىنداعى مينالاردى الىپ تاستاۋعا ۋادە بەرگەن، دەپ حابارلايدى «ازاتتىق» راديوسىنىڭ وزبەك رەداكسياسى.
وزبەكستان تاجىكستانمەن اراداعى شەكارانىڭ تاۋلى ايماقتارىن 1990 -جىلداردىڭ سوڭىندا مينالاعان بولاتىن. تاشكەنت بۇل ارەكەتىن «وزبەكستاننىڭ يسلام قوزعالىسى» مۇشەلەرىنىڭ شەكارادان ءوتىپ كەتۋىنە جول بەرمەۋ» دەپ تۇسىندىرگەن.
دۋشانبەنىڭ مالىمەتىنشە، سوڭعى 20 جىلدا تاجىكستانىڭ 800-دەن استام ازاماتى ميناعا تۇسكەن.
