اۋە اپاتىنان زارداپ شەككەندەردىڭ جالپى جاعدايى قانداي؟
نۇر-سۇلتان. قازاقپارات - قازىرگى ۋاقىتتا نۇر-سۇلتان جانە الماتى قالالارىنىڭ مەديتسينالىق ۇيىمدارىندا اۋە اپاتىنان زارداپ شەككەن 34 پاتسيەنت(ەمدەلۋشى)، ونىڭ ىشىندە 7 بالا بار.
بۇل تۋرالى ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«مەديتسينالىق ۇيىمداردىڭ رەانيماتسيا بولىمشەسىندە 2 پاتسيەنت ەمدەلۋدە (الماتى كوپبەيىندى كلينيكالىق اۋرۋحاناسىندا - 1 ناۋقاس، نۇر-سۇلتان قالاسىنداعى تراۆماتولوگيا جانە ورتوپەديا عىلىمي- زەرتتەۋ ينستيتۋتىندا - 1 ناۋقاس). بارلىق زارداپ شەككەن، ونىڭ ىشىندە وڭتۇستىك استانادا رەانيماتسيادا جاتقان پاتسيەنتتەردىڭ جاعدايى تۇراقتى، ديناميكادا جاقسارۋى بايقالادى»، - دەپ اتاپ وتەدى مينيسترلىكتەن.
ۆەدومستۆو مالىمەتىنشە، اۋە اپاتىنان زارداپ شەككەن ءۇش ادام سانيتاريالىق اۆياتسيا ارقىلى ودان ءارى ەمدەلۋ ءۇشىن نۇر-سۇلتان قالاسىنداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىنا جەتكىزىلدى. جالپى دارىگەرلەر 23 وپەراتسيا جاسادى. بارلىق جاسالعان وپەراتسيالار ءساتتى ءوتتى. بالالارعا ارنالعان جەدەل مەديتسينالىق كومەك كورسەتۋ ورتالىعىنىڭ تراۆماتولوگتارى ەكى بالاعا جوعارى تەحنولوگيالىق مەديتسينالىق قىزمەتتەردى قولدانا وتىرىپ، كەسۋسىز وپەراتسيا جاسادى.
«مۇنداي وپەراتسيانىڭ ارتىقشىلىعى - ونىڭ ەڭ از جاراقاتتانۋى جانە وپەراتسيالىق ەمدەۋدەن كەيىن بىرنەشە كۇننەن سوڭ سىنعان اياق-قولعا كۇش سالۋعا بولادى. اۋە اپاتىندا زارداپ شەككەندەرگە قاجەتتى ەمدەۋ كورسەتىلىپ جاتقانىن ايتا كەتۋ قاجەت. رەسپۋبليكالىق ع ز ي مەن ورتالىقتاردىڭ ۇزدىك ماماندارى تارتىلدى»، - دەلىنگەن مينيسترلىك اقپاراتىندا.
اۆتور: مارلان جيەمباي
