پرەزيدەنتتىك سايلاۋدا ەلدىڭ بۇرىنعى پرەمەرى جەڭىسكە جەتتى
نۇر-سۇلتان. قازاقپارات - حورۆاتيا پرەزيدەنت سايلاۋىنىڭ ەكىنشى كەزەڭىندە وپپوزيتسيالىق سوتسيال-دەموكراتيالىق پارتيانىڭ اتىنان سايلاۋعا تۇسكەن ەلدىڭ بۇرىنعى پرەمەر-ءمينيسترى زوران ميلانوۆيچ جەڭىسكە جەتتى، دەپ حابارلايدى قازاقپارات euronews.соm سايتىنا سىلتەمە جاساپ.
مەملەكەتتىك سايلاۋ كوميسسياسى بيۋللەتەندەردىڭ %99 ىن تەكسەرىپ شىعىپ، ميلانوۆيچتىڭ %53 داۋىس جيناعانىن ءمالىم ەتتى. ەلدىڭ قازىرگى پرەزيدەنتى كوليندا گرابار- كيتاروۆيچتىڭ ناتيجەسى - %47.
ءبىرىنشى كەزەڭمەن سالىستىرعاندا، پرەزيدەنتتىككە ۇمىتكەرلەر اراسىنداعى ايىرماشىلىق ەكى ەسەگە ارتتى، الايدا الەۋمەتتىك ساۋالناما بويىنشا ەكىنشى كەزەڭدە ايقىن كوشباسشى بولعان جوق.
داۋىس بەرۋ ناتيجەسى بيلىك باسىنداعى گرابار-كيتاروۆيچ قولدايتىن «حورۆاتيا دەموكراتيالىق دوستاستىعى» پارتياسى ءۇشىن ۇلكەن سوققى بولدى.
ەسكە سالا كەتسەك، 1- قاڭتاردان باستاپ ەۋروپا وداعىندا ءتوراعالىق ەتەتىن حورۆاتيادا وسى جىلدىڭ سوڭىندا پارلامەنت سايلاۋى وتەدى.
