ولەڭدى تەز جاتتاۋ ءۇشىن

الايدا ءجيى- ءجيى ولەڭ جاتتاپ، ميدى ىسكە قوسقان سايىن ەستە ساقتاۋ قابىلەتى دە جاقسارىپ، ولەڭ جاتتاۋ دا وڭايلاي تۇسەدى. ولەڭدى تەز جاتتاۋعا ارنالعان بىرنەشە ءتاسىلدى سىناپ كورىڭىز.

ولەڭ جاتتاۋدى مەيلىنشە ەرتەرەك قولعا العان دۇرىس، كەم دەگەندە ايتاتىن كۇننەن 2-3 كۇن بۇرىن جاتتاي باستاساڭىز، سول كۇنگە ساقاداي ساي تۇراسىز. الدىمەن ولەڭدى بىرنەشە رەت داۋىستاپ وقىپ الىڭىز. ودان سوڭ وقيعانىڭ ىشىنە ەنىپ، ءار كارتينانى كوزگە ەلەستەتىپ، ءمانىن ۇعىنىڭىز. ولەڭدە باس كەيىپكەر بولسا، ونىڭ ورنىنا ءوزىڭىزدى قويىپ نەمەسە اقىننىڭ نە ايتقىسى كەلگەنىن تۇسىنۋگە تىرىسىپ، جان دۇنيەسىنە ءۇڭىلىڭىز.

ولەڭدى كوشىرىپ جازىپ الساڭىز، كوز الدىندا ەلەستەپ، تاعى ءبىر ەستە ساقتاۋ جولى ارقىلى قابىلدايسىز. ەندى جازىپ العانىڭىزدى تاعى ءبىر رەت داۋىستاپ وقي وتىرىپ، ميىڭىزعا توقىپ الىڭىز. سودان سوڭ جاتتاۋعا كوشەمىز. ءبىرىنشى شۋماعىن بىرنەشە رەت وقىپ، قايتالاپ، ەسىڭىزدە ساقتاڭىز، كەلەسى شۋماقتارىن دا وسىلاي ءبىر- بىردەن قوسىپ وتىرىڭىز. قوسىمشا قاعازعا ءار جولدىڭ ءبىرىنشى جولىن جازىپ قويىڭىز. بارلىق شۋماقتى ەستە ساقتاعاننان كەيىن، ۇمىتىپ قالساڭىز، قاراپ الۋعا بولادى.

ەستە ساقتاۋدىڭ بارلىق ءتۇرىن قولدانىڭىز. داۋىستاپ وقىڭىز، كوشىرىپ جازىڭىز، داۋىسىڭىزدى ديكتوفونعا جازىپ، تىڭداڭىز. ءوز داۋىسىڭىزدى تىڭداپ، قايتالاپ ايتساڭىز دا ەستە جاقسى ساقتالادى، بۇل ءادىس اسىرەسە ماعىناسىن اسا تۇسىنبەيتىن، شەت تىلدەرىندە جازىلعان ولەڭدى جاتتاۋعا جاقسى كومەكتەسەدى.

ۇيىقتار الدىندا مىندەتتى تۇردە وقىپ جاتىڭىز، تاڭەرتەڭ تازا ميمەن تاعى قايتالاساڭىز، ەستە ساقتالۋ مۇمكىندىگى ارتا بەرەدى. ءار جولدىڭ ءبىرىنشى ءسوزىن جازىپ الىپ، ۇمىتپايتىن جەرلەرىڭىزدى بىرتىندەپ ءوشىرىپ وتىرىڭىز. الدىمەن ەكى جولدى، سودان سوڭ ءار شۋماقتىڭ ءبىرىنشى ءسوزىن، سوڭىندا ەكى شۋماقتىڭ، ءتورت شۋماقتىڭ ءبىرىنشى ءسوزىن عانا قالدىرىپ، ازايتا بەرسەڭىز، مۇدىرمەي ايتاتىنداي جاتتايسىز. رەپ سەكىلدى وقىپ نەمەسە ءبىر اۋەننىڭ ىرعاعىنا سالىپ اپ، ءان سەكىلدى جاتتاساڭىز دا تەز جاتتالادى.