ب ۇ ۇ جاڭا كيىمدى كوپ الماۋعا كەڭەس بەرەدى

بىرىككەن ۇلتتار ۇيىمىنىڭ قورشاعان ورتانى قورعاۋ باعدارلاماسى (يۋنەپ) ەسكىسىن توزدىرمايىنشا، جاڭا دجينسى ساتىپ الماۋعا كەڭەس بەرەدى، دەپ حابارلايدى قازاقپارات.

«كيىم تولى شكاف - وتكەن زاماننىڭ بەلگىسى. ەسكى كيىمدى جاڭا ءتارىزدى كيۋ «كىشكەنتاي قارا كويلەك» سەكىلدى سانگە اينالىپ كەلەدى. ءبىز ءسان يندۋسترياسىنىڭ ەكولوگيالىق تۇرعىدا تازا بولعانىن قالايمىز»، - دەيدى پاريج قالاسىنىڭ ۆيتسە- مەرى انتۋانەتتا گي.

ءسان يندۋسترياسى ءوزىنىڭ اۋقىمدى ءوندىرىس كولەمى ارقىلى كليماتتىڭ وزگەرۋىنە قارسى كۇرەسكە ايتارلىقتاي ۇلەس قوسا الادى. بۇل سالادا 300 ميلليون ادام جۇمىس ىستەيدى جانە ونىڭ جىلدىق اينالىمى 1,3 تريلليون دوللاردان اسادى. ەكولوگيالىق قوزعالىس بەلسەندىسى لوۋرەنس ميلا كانالس وندىرىستىك تىزبەكتەگى قورشاعان ورتاعا زيان كەلتىرەتىن پروتسەستەردى انىقتاۋعا جانە شارا قولدانۋعا شاقىرادى. «كيىم شىعارۋدىڭ بارلىق قاتىسۋشىلارى توقىما ونەركاسىبىندەگى ءوندىرىس پەن تابىس پروتسەستەرىن قايتا قاراستىرۋعا جانە قورشاعان ورتاعا زياندى ادىستەردەن باس تارتۋعا كۇش سالۋى كەرەك»، - دەيدى ول.

ال تۇتىنۋشىلار ەكولوگيالىق تازالىققا ۇلەس قوسۋ ءۇشىن از كيىم ساتىپ الۋى ءتيىس. ستاتيستيكاعا سايكەس، ادامدار ءبىر كيىمدى شامامەن ون رەت كيەدى. ارينە، ەلگە جانە ادامنىڭ الەۋمەتتىك جاعدايىنا بايلانىستى بۇل كورسەتكىشتەر وزگەرۋى مۇمكىن. يۋنەپ ورتاشا دەرەكتەردى ۇسىنعان.

«دەگەنمەن، جىل سايىن كيىمگە دەگەن سۇرانىس ەكى پايىزعا ارتىپ وتىرادى، ەكى مىڭىنشى جىلداردىڭ باسىمەن سالىستىرعاندا، بۇل كيىمدەردى ۇشتەن ءبىر بولىگىنە از كيەمىز. بۇل ءسان- سالتانات ءۇشىن پلانەتانىڭ قوسىمشا رەسۋرستارى جۇمسالادى. پايدالانىلعان كيىمنىڭ 87 پايىزى قوقىسقا تۇسەدى: الەم بويىنشا ءبىر سەكۋندتا تۇتاس قوقىس تاسۋشى كولىكتى كيىممەن تولتىرۋعا بولادى. يۋنەپ كيىم ساتىپ العاندا، ونى ۇزاق كيۋ ءۇشىن ماتەريالدىڭ ساپاسىنا نازار اۋدارۋعا كەڭەس بەرەدى. سونداي- اق، كيىلگەن كيىمدەردى ساتىپ الىپ، جالىقتىرعان كيىمدەردى «سەكوند حەند» دۇكەندەرگە جىبەرۋ ۇسىنىلادى. كيىمدى مۇقيات كيىپ، زاتتاردى سيرەك جۋىپ، كوپ تالشىقتى شايىپ تاستايتىن ۇنتاقتىڭ ورنىنا كونسەنترلەنگەن ارنايى سۇيىقتىقپەن جۋۋ كەرەك»، - دەلىنگەن ب ۇ ۇ حابارلاماسىندا.

اۆتور ايجان سەرىكجان قىزى