قازاقستاندىقتار جاڭا جىلدى قالاي قارسى الادى؟

ساۋالناماعا ەل بويىنشا 1038 ادام قاتىستى.

«ساۋلناماعا قاتىسقان قازاقستاندىقتاردىڭ %73 جاڭا جىلدى ۇيدە، وتباسىمەن اتاپ ءوتۋدى جوسپارلاپ وتىر. %9 تۋىستارىنا نەمەسە دوستارىنا بارادى. %5 جاڭا جىلدى جۇمىس ورنىندا قارسى الادى، ال %3 جاڭا جىل ءتۇنىن باسقا ەلدە وتكىزۋدى جوسپارلاعان»، - دەيدى كومپانيانىڭ ماركەتينگ جانە PR مەنەدجەرى دانا قاسىموۆا.

ساۋالناماعا قاتىسقان كەيبىر رەسپوندەنتتەر بۇل مەيرامدى اتاپ وتپەيتىنىن، ال باسقالارى «تىشقان جىلىن» دوستارىمەن مەيرامحانالاردا، تاۋدا، بۋرابايدا جانە باسقا جەرلەردە تويلايتىنىن جەتكىزدى.

قازاقستاندىقتاردىڭ جاڭا جىلدىق كوڭىل-كۇيىنىڭ كوتەرىڭكى بولۋى جاقىن جانە قىمبات ادامدارىنا بايلانىستى. جاڭا جىلدىق مەرەكەنىڭ اتموسفەراسىن قالا كوشەلەرىندەگى گيرلياندتار، جاۋعان قار مەن مانداريننىڭ ءيىسى ارقىلى سەزىنۋگە بولادى.

رەسپوندەنتتەردىڭ %5 جاڭا جىلدىق كوڭىل-كۇيدى وزدەرى قالاپتاستىراتىنىن ايتتى. سونداي-اق، ولار وزگەلەردەن ماراپات پەن يگى ءىس كۇتەتىنىن دە جاسىرمادى.

«ساۋالناماعا قاتىسقان ادامداردىڭ %41 «جاڭا جىلدى قالاي اتاپ وتسەڭ، جىل سولاي وتەدى» دەگەن ىرىمعا سەنەدى. سوندىقتان قازاقستاندىق وتباسىلار جاڭا جىل مەرەكەسىن ەرەكشە داستۇرگە اينالدىرعان. ءبىرى جاڭا جىلدى وتباسىمەن، اتا-اناسىمەن بىرگە قارسى السا، ەندى ءبىرىنىڭ وتباسىندا اياز اتا سىيلىقتى شىرشانىڭ ەمەس، جاستىقتىڭ استىنا قالدىرادى. كەيبىرەۋلەر ەسكى جىلدىڭ سوڭعى مينۋتىندا تىلەگىن ايتادى»، - دەيدى دانا قاسىموۆا.

كەلەسى جىلعا ارنالعان ماقساتتار مەن جوسپارلارعا كەلەتىن بولساق، قازاقستاندىقتاردىڭ %11 جاڭا جىلدا جاڭا جۇمىس ورنىن تاپقىسى كەلەدى. %11 شەتەلگە شىعۋدى جوسپارلاپ وتىر. %10 جاڭا داعدىلاردى مەڭگەرگىسى كەلەدى. %8 پاتەر ساتىپ الۋدى جانە شەت تىلدەرىن مەڭگەرۋدى ارماندايدى.