وقىس وقيعا: قازاقستاندىق ۆەلوشاباندوزداردى كولىك قاعىپ كەتتى

نۇر-سۇلتان. قازاقپارات - يسپانياداعى جاتتىعۋلاردىڭ بىرىندە قازاقستاندىق «Astana Pro Team»  كومانداسىنىڭ شاباندوزدارىن كولىك قاعىپ كەتتى، دەپ حابارلايدى قازاقپارات ءتىلشىسى.

ۆەلوكوماندانىڭ Twitter پاراقشاسىندا جاريالانعانداي، وقيعا سالدارىنان ەۆگەني گيديچ پەن ۆاديم پرونسكي جاراقات العان. ەكى سپورتشى دا اۋرۋحاناعا جەتكىزىلگەن.

ۆەلوكوماندانىڭ ۇسىنعان اقپاراتىنا سايكەس، گيديچ اۋىر جاراقات الماي، ازداپ قولىن زاقىمداعان. ال پرونسكي بولسا، تىزەدەن ەداۋىر جاراقات العان بولۋى كەرەك. سونىمەن بىرگە، دارىگەرلەرگە سپورتشىنىڭ يەگىن تىگۋگە تۋرا كەلگەن.

اۆتور: ايان بەكەن ۇلى