جاڭا زاڭدا پەداگوگ قۇقىقتارى انىق جازىلعان - ەرلان سىدىقوۆ

«بۇل زاڭ - قوعامنىڭ بارشا جىگىن بەيجاي قالدىرماعان، اسا كوپ تالقىلانعان قۇجات. ويتكەنى ەشكىم ءبىلىم سالاسىن اينالىپ وتە المايدى. ءتىپتى ءبىلىم - ءاربىرىمىزدىڭ ءوسىپ- ءونۋ جولىمىز، ادام بولۋ تاعدىرىمىز. سوندىقتان، ەڭ ءبىرىنشى، بۇل زاڭنىڭ باستاماشىسى ەلباسى بولعانىن ۇمىتپالىق. ەكىنشىدەن، «سەرپىندى زاڭدار» دەگەن ۇعىم بار. ونىڭ سەرپىنى، اسەرى قوعامعا بىردەن بىلىنەتىن بولادى. «پەداگوگ مارتەبەسى تۋرالى» زاڭ دا - سونداي زاڭ. بۇل زاڭ ۇستاز اتاۋلىنىڭ قوعامداعى بەدەلىن كوتەرە وتىرىپ، ەلدەگى ءداستۇرلى ءبىلىم كۋلتىن ودان سايىن جەتىلدىرە تۇسەدى. قوعامداعى ادام رەسۋرستارىنىڭ ساپاسىن ارتتىرادى»، - دەدى ە. سىدىقوۆ.

وسى ورايدا رەكتور بۇل سالاعا 2024 -جىلعا دەيىن 5,3 تريلليون تەڭگە قارجى بولىنەتىنىن ەسكە سالدى. سونىڭ ىشىندە 2020 -جىلى 390 ميلليارد تەڭگە جۇمسالادى.

«جالاقى ماسەلەسىنە كەلسەك، 2021 -جىلدان پەداگوگتىڭ نورماتيۆتىك وقۋ جۇكتەمەسى 18 ساعاتتان 16 ساعاتقا تومەندەتىلەدى. بۇدان باسقا مۇعالىمدەر ءۇشىن كەشەندى الەۋمەتتىك ليفت قاراستىرىلعان. بۇيىرسا، بىرتە- بىرتە مۇعالىم ماماندىعى مارتەبەلى جانە بەرەكەلى ماماندىققا اينالادى»، - دەپ توقتالدى ول.

ە. سىدىقوۆتىڭ سوزىنە قاراعاندا، ەگەر  مۇعالىم تەر توگىپ، حالىقارالىق وليمپيادا، ءتۇرلى بايقاۋ جانە سپورت جارىستارى جەڭىمپازىن ازىرلەسە، ءۇش ەڭبەكاقى مولشەرىندە سىياقى الادى. سونداي- اق «ماگيستر» دەڭگەيىندەگى مۇعالىمدەردىڭ جالاقىسىنا ۇستەمە قوسىلادى. قوعام ءۇشىن ماڭىزدى شارت - پەداگوگتىڭ لايىقتى جالاقىسى مەن ولارعا ءتيىستى الەۋمەتتىك پاكەت. جالاقى پەداگوگتىڭ ەڭبەك وتىلىنە، دارەجەسى مەن اتاعىنا، لاۋازىمىنا ساي كەستە بويىنشا تولەنەدى. بۇل رەتتە ەڭبەك دەمالىسى، جۇكتەمەسى، مەديتسينالىق ساقتاندىرۋ قاتاڭ ەسكەرىلەدى.

«قايسىبىر جەرگىلىكتى جەرلەردە قورعانسىز مۇعالىمدى پايدالانىپ قالۋ فاكتىسىن جوققا شىعارمايمىز. مۇندايدا ولاردىڭ سالالىق كاسىپوداعى، قاۋىمداستىعى جاردەم قولىن سوزۋى قاجەت. «پەداگوگ مارتەبەسى تۋرالى» زاڭدا «مەملەكەتتىك ورتا ءبىلىم بەرۋ ۇيىمدارىنىڭ پەداگوگتەرىن ولاردىڭ كاسىبي قىزمەتىن جۇزەگە اسىرۋ كەزىندە مەملەكەتتىك ەمەس ۇيىمداردىڭ شارالارىن وتكىزۋگە تارتۋ جونىندەگى ەرەجەلەر» ناقتى بەلگىلەنگەن. بۇل بويىنشا ەندى الگىدەي زاڭسىزدىقتار جاسالسا، ۇستازداردى كۇشتەمەك بولعاندار زاڭ الدىندا جاۋاپ بەرەدى. مۇعالىمدەردى قىزمەتىنە قاتىسى جوق شارانى اتقارۋدى مىندەتتەگەنى ءۇشىن ايىپپۇل تولەتۋ جاعى دا قاراستىرىلعان. اقىرى قۇقىق تۋرالى ايتىپ قالدىق، اتالعان زاڭدا كاسىبي قىزمەتتى جۇزەگە اسىرۋ كەزىندەگى پەداگوگ قۇقىقتارى، پەداگوگتىڭ ماتەريالدىق قامتاماسىز ەتۋ قۇقىعى، پەداگوگتىڭ كوتەرمەلەۋ قۇقىعى انىق جازىلىپ، جەكە باپتارمەن شەگەلەنىپ كورسەتىلگەن»، - دەپ اتاپ ءوتتى ەۇۋ رەكتورى.

ايتا كەتەيىك، ق ر پرەزيدەنتى قاسىم- جومارت توقايەۆ «پەداگوگ مارتەبەسى تۋرالى» قازاقستان رەسپۋبليكاسىنىڭ زاڭىنا قول قويدى.

اۆتور: رۋسلان عابباسوۆ