قىتايدا ءسابيدىڭ گەنىن موديفيكاتسيالاعان عالىم سوتتالدى

تەرگەۋ انىقتاعانداي، قىتايدىڭ وڭتۇستىك عىلىم جانە تەحنيكا ۋنيۆەرسيتەتىنىڭ  دوتسەنتى حە دجيانكۋي 2016 -جىلدان بەرى دجان رەنلي جانە دجين جوۋ اتتى مەديتسينالىق ۇيىمنىڭ قىزمەتكەرلەرىمەن بىرلەسىپ، ادام ەمبريونىنا زاڭسىز گەندىك موديفيكاتسيا جاساۋ تاجىريبەسىن جاساعان. سونداي- اق، ولار مەملەكەتتىڭ تەكسەرىسىنەن جالتارا وتىرىپ بۇل تەحنيكانى رەپرودۋكتيۆتى مەديتسيناعا قولدانعان. قورتىندىسىندا ولار جاسىرىن تۇردە CCR5 گەنى جوق 3 ءسابيدى دۇنيەگە اكەلگەن.

قاساقانا ەلدىڭ عىلىمي زەرتتەۋ جانە دەنساۋلىق ساقتاۋدى باسقارۋ زاڭىنا قايشىلىق جاساعانى، سول ارقىلى مەديتسينالىق ءتارتىپتى بۇزىپ، قوعامعا اۋىر زالال كەلتىرگەنى ءۇشىن، سوت حە دجيانكۋيدى 3 جىلعا باس بوستاندىعىنان ايىرىپ، 3 ميلليون يۋان (430 مىڭ دوللار) كولەمىندە ايىپپۇل تولەۋگە مىندەتتەدى. سونداي- اق، كومەكشىلەرى دجان رەنلي 2 جىلعا، دجين جوۋ 1 جىل 6 ايعا باس بوستاندىعىنان ايىرىلىپ، 1 ميلليون يۋان (143 مىڭ دوللار) جانە 500 مىڭ يۋان(71,6 مىڭ دوللار) ايىپپۇل سالىندى.

ايتا كەتەيىك، حە دجيانكۋي 2018 -جىلى قاراشا ايىندا گەندىك موديفيكاتسيا جاسالعان ەمبريوننان ەگىز بالالاردىڭ دۇنيەگە كەلگەنىن جاريالاعان بولاتىن.

 ونىڭ ايتۋىنشا، ولاردىڭ گەنى ۆ ي چ ينفەكسياسىنا قارسى تۇرا الاتىنداي ەتىپ وزگەرتىلگەن. قىتايلىق عالىمنىڭ گەندى وزگەرتۋ ءۇشىن بەلگىلى ءبىر گەندى الىپ تاستاۋعا نەمەسە قوسۋعا مۇمكىندىك بەرەتىن  CRISPR-cas9 قۇرىلعىسىن پايدالانعانىن ايتقان.

اۆتور: مۇحتار قاليموللا ۇلى