ۇشاقتاردىڭ ۇشىپ شىعۋ ينتەرۆالى بۇزىلماعان – قازايەرو ناۆيگاتسيا الماتىداعى اپات جايلى

«قازايەرو ناۆيگاتسيا» ر م ك الماتى ماڭىنداعى ۇشاق اپاتىنان كوز جۇمعانداردىڭ تۋعان- تۋىستارىنا كوڭىل ايتا وتىرىپ، زارداپ شەككەندەرگە تەزىرەك ساۋىعۋىن تىلەيدى.

«قازىرگى تاڭدا ب ا ق- تا «بەك ەير» ۇشاعىنىڭ بۇرىن ۇشىپ شىققان اۋە كەمەسىنىڭ باعىتتاس ىزىنە ءتۇسىپ كەتكەنى تۋرالى اقپارات تارادى. «قازايەرو ناۆيگاتسيا» ر م ك تاراپىنان اتالمىش اۋە اپاتىنىڭ تۇسپالدى سەبەپتەرىنە قاتىستى پىكىر ءبىلدىرۋ كوزدەلمەگەن. الايدا جوعارىدا اتالعان ءارى شىندىققا جاناسپايتىن اقپاراتتى وقي وتىرىپ، كەلەسى جايدى بايان ەتۋگە تۋرا كەلىپ تۇر: Fokker -100 اۋە كەمەسى جانە ونىڭ الدىندا ۇشىپ كەتكەن ايەروبۋس ا-321 ۇشاعى 136 توننالىق سالماقتى كوتەرە الادى. تيىسىنشە، ورتا دەڭگەيدەگى اۋە كەمەسى سانالادى. قازاقستان رەسپۋبليكاسى كولىك جانە كوممۋنيكاتسيا ءمينيسترىنىڭ 2011 -جىلدىڭ 16 - مامىرىنداعى اۋە قوزعالىسىنا قىزمەت كورسەتۋدى ۇيىمداستىرۋ تۋرالى №279 نۇسقاۋلىعىنىڭ 186-بولىگىندە كورسەتىلگەندەي، ءبىر ۇشۋ- قونۋ جولاعىنان ورتا دەڭگەيدەگى اۋە كەمەلەرىنىڭ مينيمالدى ۇشىپ شىعۋ بويىنشا ۋاقىت ارالىعى 1 مينۋتتى قۇرايدى»، - دەلىنگەن حابارلامادا.

كومپانيانىڭ حابارلاۋىنشا، قازاقستان رەسپۋبليكاسىندا بەكىتىلگەن ارالىقتار جالپى الەمدىك تالاپتار مەن ستاندارتتارعا ساي كەلەدى. حالىقارالىق اۋەجايلاردا دا ۇشىپ شىعۋ مەن قونۋ ارالىقتارى ءدال وسىنداي تارتىپپەن بەلگىلەنگەن.

«وبەكتيۆتى باقىلاۋ قۇرالىنىڭ ماتەريالدارىنا سايكەس، جوعارىدا اتالعان اۋە كەمەلەرىنىڭ ۇشىپ شىعۋ ارالىقتارى 2 مينۋت بولعان. تيىسىنشە، اتالعان ۇشاقتاردىڭ ۇشىپ شىعۋ ارالىعىندا ۋاقىت ينتەرۆالى بويىنشا ەشقانداي بۇزۋشىلىق بولماعان»، - دەلىنگەن حابارلامادا.

ايتا كەتەيىك، 27 - جەلتوقسان كۇنى الماتىدان نۇر- سۇلتان قالاسىنا ۇشىپ شىققان ۇشاق راداردان جوعالىپ كەتتى.

كەيىن 93 جولاۋشىسى جانە 5 ەكيپاج مۇشەسى بار ۇشاقتىڭ اپاتقا ۇشىراعانى ءمالىم بولدى. وقيعانىڭ ءمان- جايىن انىقتاۋ ءۇشىن ۇشاق قۇلاعان اۋماققا ارنايى كوميسسيا ۇشىپ شىقتى. وسى اپاتقا قاتىستى شۇعىل جەلى ىسكە قوسىلعان.

ق ر پرەزيدەنتى قاسىم- جومارت توقايەۆ ۇشاق اپاتىنا كىنالىلەر زاڭعا سايكەس قاتاڭ جازالاناتىنىن مالىمدەدى. ەلباسى نۇرسۇلتان نازاربايەۆ جولاۋشىلار ۇشاعىنىڭ اپاتقا ۇشىراۋىنا بايلانىستى كوڭىل ايتتى.

اۆتور: ايان بەكەن ۇلى