تايلاندتا بۇرشاق ارالاسقان داۋىل سالدارىنان اعاشتار قۇلاپ، ۇيلەر قيرادى
نۇر- سۇلتان. قازاقپارات - تايلاندتىڭ چيانگراي پروۆينتسياسىندا بۇرشاق ارالاسقان وتىز مينۋتتىق قاتتى داۋىل تۇرىپ، پروۆينتسيانىڭ ءۇش اۋدانىنداعى ەلەكتر جارىعىن ءۇزىپ، تۇرعىن ۇيلەرگە ۇلكەن زالال كەلتىردى، دەپ حابارلايدى قازاقپارات Thai PBS تەلەارناسىنا سىلتەمە جاساپ.
جەل ەلەكتر جەلىسى باعانالارىن بۇزىپ، بىرنەشە ۇلكەن اعاشتى قۇلاتتى، ولار اۆتوجولداردى جاۋىپ قالدى. ەلەكتر جارىعىن قالپىنا كەلتىرۋگە بەس ساعات كەتتى.
بۇرشاق ونداعان جەكە ءۇي مەن قورا- قوپسىنىڭ شاتىرىن تەسكەن. داۋىل كەزىندە ەشكىم زارداپ شەككەن جوق. قازىرگى ۋاقىتتا زالال شىعىنى ەسەپتەلىپ جاتىر، دەپ حابارلادى تەلەارنا.
تايلاند سينوپتيكتەرى جاقىن كۇندەرى ەلدىڭ سولتۇستىگىندە قىسقا مەرزىمدى بوران مەن بۇرشاق قايتالانۋى مۇمكىن دەيدى.
