ۇشاقتىڭ اپاتقا ۇشىراۋىنا الدىندا ۇشقان ۇشاق اسەر ەتكەن بولۋى دا مۇمكىن - ەرىك ساپاروۆ
الماتى. قازاقپارات - Bek Air اۋە كومپانياسىنىڭ ۇشۋ قىزمەتىنىڭ باسشىسى ەرىك ساپاروۆ 27 - جەلتوقساندا الماتىدا Fokker 100 ۇشاعىنىڭ اپاتقا ۇشىراۋىنا قاتىستى ىشكى تەكسەرۋدىڭ ناتيجەلەرىن جاريالادى، دەپ حابارلايدى قازاقپارات ءتىلشىسى.
ۇشۋ قىزمەتى باسشىسىنىڭ ايتۋىنشا، اۋە كەمەسىنىڭ كومانديرى ۇشاق پەن جولاۋشىلاردى امان الىپ قالۋ ءۇشىن سوڭىنا دەيىن ارەكەت جاساعان.
«جەل – 140، تىنىش، 1000 مەتردەن ءبارى كورىنەدى، ەرەكشە قۇبىلىستار بايقالمايدى. وندا نەلىكتەن ۇشاق تەڭسەلىپ، ءبىر قاناتىنان ەكىنشى قاناتىنا اۋىسىپ، اۋىتقيدى، بۇعان العان جىلدامدىق سەبەپ پە؟ ءبىز الدىمىزدا قانداي ۇشاق ۇشقانى تۋرالى دەرەكتەردى الدىق. بەلگىلى بولعانداي، الدىمىزدا 90 تونناعا دەيىن جۇك كوتەرە الاتىن ماسكەۋگە باعىت العان Air Astana اۋە كومپانياسىنا تيەسىلى Airbus 321 Neo ۇشاعى ۇشقان.
ەندى ۇشۋ ۋاقىتىنا نازار اۋدارىڭىزدار: 01:19 سەكۋند UTC، ياعني الماتى ۋاقىتى بويىنشا - 7:19. ونىڭ جىلدامدىعى - 184 ءتۇيىن. ءبىزدىڭ Fokker 100 ساعات 01: 20 سەكۋندتا، جىلدامدىعى 155 تۇيىنمەن ۇشتى. ياعني، اراسى - 1 مينۋت، Fokker 100 كوككە كوتەرىلگەندە الدىڭعى ۇشاقتىڭ اۋادا قالدىرعان ءيىرىم ىزىنە بارىپ شاتاستى، - دەدى ول.
ونىڭ مالىمەتىنشە، ۇشاقتىڭ اپاتقا ۇشىراۋىنا الدىندا ۇشقان ۇشاقتىڭ ءتۇتىنى اسەر ەتكەن بولۋى دا مۇمكىن. ەكى ۇشاقتىڭ اراسىندا ۇشۋ ۋاقىتىنىڭ ارالىعى كەم دەگەندە 2 مينۋت بولۋى ءتيىس.
بريفينگ بارىسىندا Bek Air كومپانياسىنىڭ باسشىسى نۇرلان جۇماسۇلتانوۆ كومپانيا اتىنان اپاتتا قازا بولعانداردىڭ وتباسىلارىنا كوڭىل ايتتى.
اۆتور: الما مۇقانوۆا
