«بەك ەير» باسشىلىعىنىڭ ب ا ق الدىنا شىعۋدان باس تارتۋى دۇرىس ەمەس - رومان سكليار

بۇل تۋرالى ق ر پرەمەر-ءمينيسترىنىڭ ورىنباسارى رومان سكليار ايتتى، دەپ حابارلايدى قازاقپارات ءتىلشىسى.

«مەنىڭشە، ولاردىڭ ب ا ق الدىنا شىقپاۋى دۇرىس ەمەس. ولار قازا تاپقان جولاۋشىلاردىڭ تۋىستارىنا قانداي قولداۋ شارالارىنىڭ كورسەتىلەتىندىگىن، زارداپ شەككەندەرگە قانداي كومەك بەرەتىندىكتەرىن ءتۇسىندىرۋى قاجەت»، - دەدى ول ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا.

سونىمەن قاتار، ۆيتسە-پرەمەر اتالعان اۋە كومپانياسىنىڭ رەيستەرىنە ساتىپ الىنعان بيلەتتەردىڭ قانشاسى قايتارىلعاندىعىنا قاتىستى دەرەكتەرمەن ءبولىستى.

«10-قاڭتارعا دەيىنگى ارالىققا اۋە كومپانياسى شامامەن 19 مىڭ بيلەت ساتقان. قازىردىڭ وزىندە 9 مىڭعا جۋىق بيلەت قايتا تاپسىرىلدى نەمەسە وزگە اۋە كومپانيالارىنىڭ رەيستەرىنە قايتا بروندالدى. وسىناۋ قيىن جاعدايدا قاجەتتى كومەك كورسەتۋگە شەشىم قابىلداعان Kazakh Air، Scat, Air Astana اۋە كومپانيالارىنا ريزاشىلىعىمىزدى بىلدىرگىم كەلەدى. سونىمەن قاتار، قازاقستان تەمىر جولى باسشىلىعىنا وسىنداي جاعدايدا جولاۋشىلارعا بارىنشا كومەك كورسەتۋ ءۇشىن قوسىمشا پويىز ۇيىمداستىرعانىنا العىس ايتامىن»، - دەدى ر. سكليار.

اۆتور: مارلان جيەمباي