ماگيسترالدىق «سارى ارقا» گاز قۇبىرى ىسكە قوسىلدى

بۇل تۋرالى ق ر ەنەرگەتيكا مينيسترلىگىنىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات.

قىزىلوردا وبلىسىنان باستاۋ العان «سارى ارقا» گاز قۇبىرى ەلىمىزدىڭ ەلورداسىن، ورتالىق جانە سولتۇستىك وڭىرلەرىن وتاندىق كوگىلدىر وتىنمەن قامتاماسىز ەتۋگە مۇمكىندىك بەرەدى.

«نۇر-سۇلتان، قاراعاندى، تەمىرتاۋ، جەزقازعان قالالارىنىڭ جانە گاز قۇبىرى تراسساسىنىڭ بويىنا جاقىن ورنالاسقان 171 ەلدى مەكەننىڭ شامامەن 2,7 ميلليون تۇرعىنى تابيعي گازعا قول جەتكىزەدى. اتالعان گاز قۇبىرىن سالۋ ق ر تۇڭعىش پرەزيدەنتى - ەلباسى ن. ءا. نازاربايەۆتىڭ «بەس الەۋمەتتىك باستاما» اتتى قازاقستان حالقىنا جولداۋىنىڭ اياسىندا جانە «سارى ارقا ماگيسترالدىق گاز قۇبىرى قۇرىلىسىن ۋاقتىلى اياقتاۋ تۋرالى مەملەكەت باسشىسى ق. ك. توقايەۆتىڭ «يگىلىك بارشاعا! ساباقتاستىق. ادىلدىك. ورلەۋ» سايلاۋالدى باعدارلاماسى اياسىندا جۇزەگە اسىرىلدى. 2018-جىلدىڭ جەلتوقسان ايىندا ەلباسىنىڭ قاتىسۋىمەن وتكەن تەلەكوپىر بارىسىندا گاز قۇبىرىنىڭ قۇرىلىسىن باستاۋ ءراسىمى ءوتتى. بيىلعى قاڭتاردا تەحنيكا مەن ادامداردى جۇمىلدىرۋ، ناۋرىز ايىندا گاز قۇبىرىن دانەكەرلەۋ جۇمىستارى باستالدى. قۇرىلىس بارىسىندا 1 مىڭنان استام تەحنيكا جانە شامامەن 2 مىڭ ادام جۇمىسقا تارتىلدى»، - جەلىنگەن مينيسترلىك مالىمەتىندە.

سونىمەن قاتار، قۇرىلىس بارىسىندا وتاندىق وندىرۋشىلەر بارىنشا جۇمىلدىرىلدى. باس مەردىگەر - وتاندىق «قاز قۇرىلىس سەرۆيس» كومپانياسى. ىلمەكتى ارماتۋرا جانە كران توراپتارىمەن جەرگىلىكتى ءوندىرۋشى «بەمەر ارماتۋرەن قازاقستان» كومپانياسى، ال اۆتوماتتاندىرىلعان گاز تاراتۋ ستانتسيالارىمەن «باتىس مۇناي گاز جابدىقتارى» كومپانيالارى قامتاماسىز ەتتى.

«نورماتيۆتى مەرزىممەن سالىستىرعاندا ايتارلىقتاي قىسقا مەرزىمدە 1061,3 كيلومەتر گاز قۇبىرى، 5 بىرلىك قۋاتتى اۆتوماتتاندىرىلعان گاز تاراتۋ ستانتسياسى، سونداي-اق گاز ولشەۋ ستانساسى سالىندى. بۇل جۇمىستىڭ ۇيلەسىمدىلىگىن جانە ءبىزدىڭ ماماندارىمىزدىڭ جوعارى كاسىبي دايارلىعىن، قۇرىلىس بارىسىندا پايدالانىلعان تەحنولوگيالاردىڭ يننوۆاتسيالىعىن كورسەتەدى»، - داپ اتىلىپ وتكەن حابارلامادا.

تۇتاستاي العاندا، جوبانى ىسكە اسىرۋ مۋلتيپليكاتيۆتى اسەر اكەلەتىنىن، شاعىن جانە ورتا بيزنەستىڭ دامۋىنا، جاڭا جۇمىس ورىندارىنىڭ پايدا بولۋىنا، سونداي-اق گاز قۇبىرى بويىنداعى وڭىرلەر ينفراقۇرىلىمىنىڭ دامۋىنا سەرپىن بەرەتىنىن اتاپ وتكەن ءجون.