ەسەپ كوميتەتى: ۇلتتىق كينويندۋستريانى قولداۋدا ولقىلىقتار بارشىلىق

«مادەنيەت جانە سپورت مينيسترلىگىنىڭ قابىلداعان شارالارىنا قاراماستان، قازىرگى ۋاقىتتا مادەنيەت سالاسىنداعى مەملەكەتتىك ساياساتتى ىسكە اسىرۋ ماسەلەلەرىندە ءبىرقاتار جۇيەلىك پروبلەما بار. مينيسترلىك بولىنگەن قاراجاتتى ءتيىمدى پايدالانۋ جۇمىسىن جەتكىلىكتى دارەجەدە باقىلاماي وتىر. الەۋمەتتىك ماڭىزى بار جانە مادەني شارالاردى وتكىزۋ اياسىندا جەكە مەملەكەتتىك ساتىپ الۋلاردى جاريالاعان كەزدە الەۋەتتى جەتكىزۋشىلەرگە قۇقىققا قايشى تالاپتار قويىلادى. وسىلايشا، مەملەكەتتىك ساتىپ الۋعا قاتىسۋعا نيەتتى جەتكىزۋشىلەردىڭ سانى ازايادى»، - دەدى ەسەپ كوميتەتىنىڭ مۇشەسى تالعات جاقان ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ۇلتتىق كينويندۋستريانى قولداۋ شارالارىنىڭ ولقىلىقتارى بارشىلىق.

«جاڭادان قۇرىلعان «ۇلتتىق كينونى قولداۋدىڭ مەملەكەتتىك ورتالىعى» اكسيونەرلىك قوعامىنىڭ ءبىرىڭعاي وپەراتورىن قاراجاتپەن قامتۋ مەملەكەتتىك بيۋدجەتتىڭ ەسەبىنەن جۇزەگە اسىرىلادى. سونىمەن بىرگە، بۇل ورتالىقتىڭ باسقا كىرىس كوزى جوق»، - دەدى تالعات جاقان.

ونىڭ ايتۋىنشا، وسى جىلدىڭ ناۋرىز ايىندا قۇرىلعان ورتالىقتىڭ شىعىنى 2019 -جىلدىڭ 1 - قازانىنداعى جاعداي بويىنشا 126,6 ميلليون تەڭگەگە جەتكەن. ال وعان نەگىزىنەن 2 ميلليارد 460 ميلليون تەڭگە بولىنگەنىمەن اتالعان سومانىڭ 5,1 پايىزى عانا يگەرىلىپ وتىر. قالعان اقشانىڭ يگەرىلمەي قالاتىن ءتۇرى بار.

«ونىڭ ۇستىنە كينو ورتالىعى اشىلعالى ساراپشىلار كەڭەسىنىڭ ءبىر عانا وتىرىسى وتكەن»، - دەيدى ول.

اۆتور: ايان بەكەن ۇلى