الماتى وبلىسىندا اۋدان اكىمىنىڭ ورىنباسارى توبەلەستى

الماتى وبلىسى اكىمىنىڭ باسپا ءسوز حاتشىسى عالىمۇرات جۇكەلدىڭ اتالعان وقيعاعا قاتىستى تۇسىنىكتەمە بەردى.

عالىمۇرات جۇكەلدىڭ ايتۋىنشا بۇل جاڭا جىلدىق كەش ەمەس.

«وقيعا «بەلىە روزى» مەيرامحاناسىندا 25- جەلتوقسان كۇنى، تۇنگى 00.30 دا بولعان. اۋدان اكىمىنىڭ ورىنباسارى مەيرامحانا قوناعىمەن سوزگە كەلىپ قالعان. داۋ سوڭى توبەلەسكە ۇلاسقان. قازىرگى تاڭدا لاۋازىمدى تۇلعادان تۇسىنىكتەمە الىنعان. الداعى ۋاقىتتا وعان قاتىستى تارتىپتىك جازا قولدانىلادى»، - دەدى ول «Facebook» پاراقشاسىندا.

سونداي-اق ول جامبىل اۋدانى اكىمىنىڭ توراعالىعىمەن وتكەن وتىرىستا جاڭاجىلدىق ۇجىمدىق كەشتەردى ۇيىمداستىرۋعا تىيىم سالىنعان حاتتامانىڭ جانە «بەلىە روزى» مەيرامحاناسى اكىمشىلىگىنىڭ جامبىل اۋدانى اكىمدىگىنىڭ جاڭاجىلدىق كەشىن وتكىزبەگەنى تۋرالى تۇسىنىكتەمەسى جازىلعان سۋرەتتەردى دە جاريالادى.

ايتا كەتسەك، الەۋمەتتىك جەلىدە بىرنەشە ەر ازاماتتىڭ جاعا جىرتىسىپ، ءبىر-ءبىرىن سوققىعا جىعىپ، توبەلەسىپ جاتقان ءساتى بەينەلەنگەن ۆيدەو تارادى. جەلى پايدالانۋشىلار توبەلەستە جامبىل اۋدانى اكىمىنىڭ ورىنباسارى مەن مەملەكەتتىك قىزمەتكەرلەردى تانىپ، ولار جاڭا جىلدىق ۇجىمدىق كەشتى تويلاپ جاتقاندا توبەلەسكەن دەپ پىكىر قالدىرعان.