جەەنبەكوۆ: اتامبايەۆ تاعدىرىنا مەن دە بەيجاي قاراي المايمىن
نۇر-سۇلتان. قازاقپارات - قىرعىز پرەزيدەنتى سوورونباي جەەنبەكوۆ جىل سايىنعى باسپا ءسوز كونفەرەنتسياسىندا بۇرىنعى پرەزيدەنت المازبەك اتامبايەۆتىڭ توڭىرەگىندەگى جاعدايعا قاتىستى ساۋالدارعا جاۋاپ بەردى دەپ جازادى Centralasian.org.
مەملەكەت باسشىسى ەكس-پرەزيدەنت اتامبايەۆتىڭ تاعدىرىنا بەيجاي قاراي المايتىنىن ايتىپ، بىرنەشە جىل بويى ونىمەن بىرگە ەل تاعدىرى ءۇشىن كۇرەسكەنىن ەسكە سالدى.
«پرەزيدەنت بولعان ۋاقىتتان بەرى مەن ول تۋرالى جامان سويلەمەدىم. ماعان حالىقتىڭ ىنتىماعى ماڭىزدى. ولاردىڭ ءتۇرلى مالىمدەمەلەرىنە نازار اۋدارمادىم، ءبىراق ولار بيلىكتى باسىپ الىپ، ەلدى ەكىگە بولۋگە تالپىنىس جاساماق بولدى.
ول رايىنان قايتار دەپ ۇمىتتەندىم. قازىر مەن ەشتەڭە شەشپەيمىن. جاعداي وزگەردى. ونى قۇقىق قورعاۋ ورگاندارى مەن سوت جۇيەسى شەشەدى.
كوميسسيا شەشىمىنە پىكىر ايتقىم كەلمەيدى. ارينە، مەن دە الاڭدايمىن، كۇردەلى جاعداي»، - دەپ مالىمدەدى جەەنبەكوۆ.
7-8- تامىزدا كوي-تاش اۋىلىندا بۇرىنعى پرەزيدەنت المازبەك اتامبايەۆتى تەرگەۋگە ماجبۇرلەپ اكەلۋ ءۇشىن ارنايى وپەراتسيا ۇيىمداستىرىلدى.
ارنايى جاساققا اتامبايەۆ جاقتاستارى قارسى شىقتى. وپەراتسيانىڭ العاشقى كۇنى ارنايى جاساق قىزمەتكەرى ۋسەنبەك نيازبەكوۆ وققا ۇشتى، 200 دەن استام ادام جارالاندى.
كەلەسى كۇنى اتامبايەۆ ءوز ەركىمەن بەرىلدى. قازىر ول ۇلتتىق قاۋىپسىزدىك مەملەكەتتىك كوميتەتىنىڭ تەرگەۋ اباقتىسىندا وتىر. وعان قارسى بىرنەشە قىلمىستىق ءىس قوزعالدى.
