ساراپشىلار كىمگە باعا قويىپ وتىرعاندارىن بىلگەن جوق - انار جايىلعانوۆا

بۇل تۋرالى ورتالىق كوممۋنيكاتسيالار قىزمەتىندە جۋرناليستەرمەن بولعان بريفينگتە ق ر مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا ايتتى، دەپ حابارلايدى قازاقپارات ءتىلشىسى.

«ىرىكتەۋدىڭ اشىقتىعىنا كەلەتىن بولساق، ونى ءبىرىنشى كەزەڭنەن باستاپ ونلاين فورماتتا وتكىزدىك. ول دەگەنىمىز - بارلىق تەست ونلاين فورماتتا وتەدى دەگەن ءسوز، ياعني وعان ەشكىم ەشقانداي اسەر ەتە المايدى»، - دەيدى انار جايىلعانوۆا.

ول ىرىكتەلگەن 300 ادامنىڭ ىشىندە كۆازيمەملەكەتتىك سەكتوردىڭ جاۋاپتى لاۋازىمدارىنا رەزەرۆشىلەردەن بولەك مەملەكەتتىك قىزمەتكەرلەر دە كىرگەنىن ايتتى.

«ال ىرىكتەلگەندەردىڭ ىشىندە نە سەبەپتى مەملەكەتتىك قىزمەتشىلەر بولعانى تۋرالى ايتىپ وتسەك، ءبىزدىڭ قويعان تالاپتار قاراپايىم بولدى. ول 35 جاسقا دەيىنگى، جوعارى ءبىلىمى بار قر ازاماتى بولۋى كەرەك. سونداي- اق، كەم دەگەندە 5 جىل جۇمىس ءوتىلى بولۋى قاجەت. سوندىقتان وسى تالاپقا ساي بولعان قاتىسقىسى كەلەتىن ادامداردىڭ ءبارى قاتىستى. كونستيتۋتسيامىز بويىنشا باسقا تالاپتار بويىنشا قاتىستىرماي قويىپ، قۇقىعىن شەكتەۋگە قۇقىمىز جوق. ودان كەيىنگى ەسسە جازۋ، جوبالاردى كورسەتۋ سياقتى كەزەڭدەر دە ونلاين فورماتتا ءوتتى. ساراپشىلاردىڭ وزدەرى دە كىمگە باعا قويىپ وتىرعاندارىن بىلگەن جوق، سەبەبى قاتىسۋشىداردىڭ اتى- جوندەرى كودپەن تۇردى. ءبىر جوبانى قاراعان ءۇش ساراپشى دا ءبىرىن- ءبىرى تانىمايدى جانە ەسسە مەن جوباعا ءوز باعالارىن بەرىپ وتىردى. ونىڭ ناتيجەسى بىردەن بازاعا كەتىپ وتىردى، بازاعا كەتكەن ەسەپتە ەشكىم وزگەرتە المايدى»، - دەيدى ول.

ەسكە سالا كەتسەك، پرەزيدەنتتىك جاستار كادر رەشەرۆىنە ىرىكتەۋ بيىل قىركۇيەك ايىندا باستالدى.

اۆتور: زارينا قاھارمان