قوستانايدا ءسىبىر ەلىگىن اتقاندار ۇستالدى

پوليتسيانىڭ باسپا ءسوز قىزمەتى تاراتقان اقپاراتقا سۇيەنسەك، 23-جەلتوقسان كۇنى ىزدەۋدە جۇرگەن 44 جاستاعى ازاماتتى ۇستالعان. ءتىنتۋ بارىسىندا ونىڭ ۇيىنەن 4 جابايى قابان مەن 6 ءسىبىر ەلىگى تاركىلەندى. سونداي-اق، ەكى ەلىك جانە ءبىر جابايى قاباننىڭ ەتى، تىركەلمەگەن تەگىس ۇڭعىلى مىلتىق پەن 60 وق تابىلدى.

«قوستاناي وبلىسىنىڭ تابيعات قورعاۋ پوليتسياسىنىڭ باستىعى پوليتسيا پودپولكوۆنيگى تالعات احمەتوۆتىڭ ايتۋىنشا، 2019 -جىلدىڭ 7-قىركۇيەگىنەن باستاپ 31-جەلتوقسانعا دەيىن جابايى قابان مەن ەلىكتى اۋلاۋ ماۋسىمى اشىق. جانۋارلاردى اتۋ ءۇشىن اڭ اۋلاۋ ليتسەنزياسى كەرەك. اتالعان اڭشىنىڭ رۇقسات قۇجاتتارى جوق بولىپ شىقتى. قازىرگى ۋاقىتتا ق ر ق ك 337-بابىنا سايكەس «زاڭسىز اڭ اۋلاۋ» فاكتىسى بويىنشا سوتقا دەيىنگى امالدار جۇرگىزىلىپ جاتىر»، - دەدى وبلىستىق پوليتسيا دەپارتامەنتى باسپا ءسوز قىزمەتىنىڭ مامانى كەنجە قونىسباي.

جىل باسىنان بەرى قوستاناي وبلىسىندا 22 زاڭسىز اڭ اۋلاۋ فاكتىسى انىقتالعان، تابيعاتتى قورعاۋ زاڭناماسىن بۇزعانى ءۇشىن 700 دەن استام ادام اكىمشىلىك جاۋاپكەرشىلىككە تارتىلدى.

اۆتور: قاسقىرباي قويشىمانوۆ