ۇكىمەت باسشىسى: قورشاعان ورتانى بارىنشا ساقتاپ قالۋىمىز كەرەك

«ەلىمىزدەگى ەكولوگيالىق جاعدايدى جاقسارتۋ – ق ر تۇڭعىش پرەزيدەنتى - ەلباسى نۇرسۇلتان نازاربايەۆ پەن پرەزيدەنت قاسىم-جومارت توقايەۆتىڭ الدىمىزعا قويعان اسا ماڭىزدى مىندەتتەرىنىڭ ءبىرى. جىل سايىن ەكولوگيالىق قاۋىپسىزدىك ماسەلەلەرى وزەكتى بولا تۇسۋدە. اتموسفەراعا شىعارىلاتىن شىعارىندىلار ادامداردىڭ دەنساۋلىعىنا عانا ەمەس، ەكونوميكاعا دا اسەر ەتەدى. دەنساۋلىق ساقتاۋ سالاسىنا جۇمسالاتىن شىعىستار ۇلعايىپ، ەڭبەك ونىمدىلىگى تومەندەۋدە. قازاقستاندا كەيىنگى 4 جىلدا اتموسفەراعا تاستالاتىن لاستاۋشى شىعارىندىلار كولەمى 13 پايىزعا ءوستى. ءىرى قالالاردا اۋانىڭ لاستانۋىنا اسەر ەتەتىن نەگىزگى فاكتور - اۆتوكولىك»، - دەدى اسقار مامين ۇكىمەت وتىرىسىندا.

پرەمەر-ءمينيستردىڭ ايتۋىنشا، مىسالى الماتى قالاسىندا اتموسفەراعا شىعارىلاتىن بارلىق شىعارىندىلاردىڭ 65 پايىزى - اۆتوكولىكتەرگە تيەسىلى.

«ءبىز قورشاعان ورتانى بارىنشا ساقتاپ قالۋىمىز كەرەك. بالامالى ەنەرگەتيكانى دامىتىپ، قالدىقتاردى باسقارۋ ماسەلەلەرىن پىسىقتاۋ قاجەت»، - دەدى ول.

ەسكە سالا كەتسەك، بۇعان دەيىن ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ءتيىستى شارا قابىلدانباسا، 2030-جىلى بولجام بويىنشا لاستاۋشى زاتتاردىڭ ەميسسياسى 3,6 ميلليون تونناعا دەيىن وسەتىنىن بولجاعان ەدى.