ەڭبەك مينيسترلىگى جاڭا جىلدىق كورپوراتيۆتىڭ ورنىنا بالالارعا ەرتەڭگىلىك وتكىزەدى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ مينيسترلىگى جاڭا جىلدىق كورپوراتيۆتىڭ ورنىنا بالالارعا ارنالعان قايىرىمدىلىق شاراسىن وتكىزەدى، دەپ حابارلايدى قازاقپارات مينيسترلىك سايتىنا سىلتەمە جاساپ.

«ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ قىزمەتكەرلەرى مەرەكەلىك كورپوراتيۆتى شارانىڭ ورنىنا تابىسى از جانە كوپبالالى وتباسىلاردان شىققان 300 بالاعا، سونداي-اق مۇگەدەكتىگى بار بالالارعا ارنالعان قايىرىمدىلىق جاڭا جىلدىق تاڭەرتەڭگىلىك وتكىزۋگە شەشىم قابىلدادى»، دەلىنگەن حابارلامادا.

مينيسترلىك ۇجىمى مۇقتاج وتباسىلاردىڭ بالالارىنا تاڭەرتەڭگىلىكتى جانە سىيلىقتاردى ۇيىمداستىرۋعا ەرىكتى تۇردە قاراجات جينادى.

«ءبىز ەڭبەك جانە حالىقتى الەۋمەتتىك قورعاۋ مينيسترلىگىندە جۇمىس ىستەيمىز. ءبىزدىڭ ۇجىمنىڭ ءاربىر قىزمەتكەرى كومەككە جانە الەۋمەتتىك قولداۋعا مۇقتاج قازاقستاندىقتاردىڭ ءومىرىن جاقسارتۋعا ءوز ۇلەسىن قوسادى. بۇل قايىرىمدىلىق اكسياسى بيىلعى جىلى جۇمىسىمىزدىڭ جاقسى اياقتالۋى بولادى دەپ ەسەپتەيمىن! ال، بالالارعا مەرەكە سىيلاۋ - يگى ءىس»، - دەدى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ.

جاڭا جىلدىق ەرتەڭگىلىككە شاقىرىلاتىن بالالاردىڭ ءتىزىمىن مينيسترلىك قىزمەتكەرلەرى ەلوردالىق اكىمدىكتىڭ ماماندارىمەن بىرلەسىپ جاسادى. وعان تابىسى از، كوپبالالى وتباسىلاردان شىققان 300 بالا، سونداي-اق مۇگەدەك بالالار كىردى.

مەرەكەلىك شارا 29- جەلتوقساندا ءال-فارابي اتىنداعى وقۋشىلار سارايىندا وتەدى. بالالار اياز اتا مەن اقشاقارمەن بىرگە شىرشانىڭ اينالاسىندا بيلەپ، «اق پاتشايىم» تەاترلاندىرىلعان قويىلىمىن تاماشالاپ، سىيلىقتار الادى.

ەسكە سالا كەتسەك، الماتىلىق مۇعالىمدەر جاڭا جىلدىق كەشتەن باس تارتقان ەدى.