قانات يسلامنىڭ كەلەسى جەكپە- جەگى قاشان بولادى

الماتى. قازاقپارات - جەڭىلىپ كورمەگەن قازاقستاندىق بوكسشى قانات يسلام (27-0, 21 ك و) ءوزىنىڭ جاتتىعۋعا كىرىسكەنىن جانە كەلەسى جەكپە- جەكتىڭ وتەتىن ۋاقىتىن ايتتى، دەپ حابارلايدى قازاقپارات.

«دوستار! جاتتىعۋ پروتسەسى باستالدى! كەلەسى جىلدىڭ ناۋرىز ايىندا ءبىزدى ۇلكەن جەكپە- جەك كۇتىپ تۇر! جاڭالىقتاردى قاداعالاڭىز» ، — دەپ جازدى قانات يسلام Instagram پاراقشاسىندا جاعادا جاتتىعىپ جۇرگەن ۆيدەوسىن جاريالاپ.

ەسكە سالا كەتەيىك، بوكسشى وسى جىلداعى سوڭعى جەكپە- جەگىن 26 - قازاندا وتكىزگەن بولاتىن. الماتىدا باستى بوكس كەشىندە قازاقستاندىق سپورتشى ءبىراۋىزدان سۋديالاردىڭ شەشىمىمەن ناميبيادان كەلگەن بوكسشى ۋولتەر كاۋتوندوكۆانى (18-2, 17 KO) — 97-92, 97-92, 99-92 ەسەبىمەن ۇتتى. وسىلايشا ول ءبىرىنشى ورتا سالماقتا International WBO تيتۋلىن ساقتاپ قالدى.

ناتيجە كوپتەگەن داۋدىڭ تۋۋىنا سەبەپ بولدى، ال كاۋتوندوكۆا تاراپى دۇنيەجۇزىلىك بوكس ۇيىمىنان (WBO) وتەماقى تالاپ ەتۋگە شەشىم قابىلدادى.