الماتىدا مۇعالىمدەر جاڭا جىلدىق كەشتەن باس تارتتى
جەتىسۋ اۋدانىنىڭ 21 مەكتەپ ديرەكتورى مەن 22 بالاباقشا مەڭگەرۋشىسى جاڭاجىلدىق كەشتەن باس تارتتى. مۇعالىمدەر بۇل قاراجاتتى قايىرىمدىلىق ماقساتتا جۇمساماق.
مۇقتاج وتباسىلارعا ازىق- تۇلىك پەن كيىم- كەشەك تاراتۋ جوسپاردا بار.
«بۇل باستامانى كوتەرگەن اۋدان اكىمدىگىنىڭ باسشىسى بولاتىن. جەتىسۋ اۋدانىندا مۇقتاج وتباسىلار وتە كوپ. بۇل جولى مۇمكىندىگى شەكتەۋلى بالالاردىڭ وتباسىنا كومەك بەرۋگە باسا نازار اۋدارىلىپ وتىر. بالالارعا قىسقى سىرت كيىم، جىلى اياق كيىم، ازىق- تۇلىك كارزەڭكەسى بەرىلەدى. سونىمەن قاتار، #137 مەكتەپ وقۋشىسىنىڭ ومىرتقاسىنا وتا جاساۋ ءۇشىن قاراجات بەرىلەدى»، - دەدى جەتىسۋ اۋدانى ءبىلىم ءبولىمىنىڭ باسشىسى سالتانات قۇسايىنوۆا.
ونىڭ ايتۋىنشا، بولاشاقتا مۇعالىمدەر بۇل باستامانى قايىرىمدىلىق ەستافەتاسىنا اينالدىرماق.
ايتا كەتەيىك، بۇعان دەيىن جەتىسۋ اۋدانىنىڭ 2019 -جىلعى تۇلەكتەرى ارنايى كەش جاساۋدان باس تارتىپ، جينالعان قاراجاتتى قايىرىمدىلىق شارالارىنا جۇمساعان بولاتىن.
اۆتور: گۇلميرا عوسمانالي
