شىمكەنتتە مۇحتار شاحانوۆتىڭ شىعارماشىلىق كەشى ءوتتى

شىمكەنت. قازاقپارات - شىمكەنت قالاسىنداعى «تۇركىستان» سارايىندا اقىن، دراماتۋرگ مۇحتار شاحانوۆتىڭ «بودەنە تالانتتار مەن قاجىمۇقاندار» اتتى شىعارماشىلىق ءان-جىر كەشى ءوتتى، دەپ حابارلايدى قازاقپارات ءتىلشىسى.

اقىننىڭ شىعارماشىلىق كەشىنە ارنايى قاتىسقان شىمكەنت قالاسىنىڭ اكىمى ەرلان ايتاحانوۆ مۇحتار شاحانوۆتىڭ قازاق ادەبيەتىنىڭ ابىزى رەتىندە ەلىمىزگە وراسان زور ەڭبەگىن اتاپ ءوتتى.

«ەلباسى «بولاشاققا باعدار: رۋحاني جاڭعىرۋ» ماقالاسىندا ۇلتتىق جاڭعىرۋ ۇعىمى - ۇلتتىق سانانىڭ كەمەلدەنۋىن بىلدىرەتىنىن ايتىپ، قازىرگى تاڭدا ۇلتتىق سانا-سەزىم كوكجيەگىن كەڭەيتۋ كەرەكتىگىنە توقتالعان بولاتىن. ال، وسى كوكجيەكتى كەڭەيتەتىن اقىن-جازۋشىلار ەكەنى ايتپاسا دا تۇسىنىكتى. ولار حالىقتى رۋحاني سۋسىنداتىپ، سانالارىنا ۇلتتىق كودتى سىڭىرۋگە تىرىسادى. ال، ۇلتتىق كود - ماڭگىلىك ەلگە باستار قادام. وسى باعىتتا قازاق ادەبيەتىنىڭ ابىزى رەتىندە ەلىمىزگە وراسان زور ەڭبەگىڭىزدى ەرەكەشە اتاپ وتكىم كەلەدى. مۇحتار شاحانوۆ - الەم اقىنى. سەبەبى، قازاقتىڭ مۇحتارىن الەم مويىنداعان»، - دەدى ەرلان ايتاحانوۆ.

شارا بارىسىندا كورەرمەندەر كەش يەسى جايىنداعى دەرەكتى فيلمدى تاماشالاپ، رۋحاني ازىق الدى. رۋحاني كەشتە قازاقستان رەسپۋبليكاسىنىڭ مادەنيەت قايراتكەرى، ەسترادا ءانشىسى حاديشا شالابايەۆا جانە ءانشى ساندۋعاش ستامعازيەۆا اقىننىڭ اۆتورلىق اندەرىن شىرقاپ، قازاق رۋحىن اسقاقتاتتى. سونىمەن قاتار، شىمكەنت قالاسى مادەنيەت ءۇيىنىڭ انشىلەرى جانە قارا ولەڭدى جانىنا سەرىك ەتكەن شاحانوۆ ءىزباسارلارى ءان-جىردان شاشۋ شاشتى.

ايتا كەتەيىك، مۇحتار شاحانوۆتىڭ «جۇبايلار جىرى»، «تۋعان كۇن كەشىندە»، «گۇل داۋرەن»، «مەن ساعان عاشىق ەدىم» اتتى اندەرى ەل اۋزىندا. سونىمەن قاتار، بىرنەشە ولەڭ كىتابىنىڭ جانە حالىق اراسىنا كەڭ تاراعان ءبىرقاتار ءاننىڭ اۆتورى.

باللادالارى مەن پوەمالارى 20 دان استام تىلگە اۋدارىلعان. «ماحاببات زاڭى»، «سەنىم پاتشالىعى»، «سوكراتتى ەسكە الۋ ءتۇنى» اتتى درامالارى رەسپۋبليكامىزدا جانە شەتەل تەاترلارىندا قويىلعان.

ەسكە سالايىق، بۇگىن قالاداعى «وتىرار» كىتاپحاناسىندا دارابوز اقىننىڭ «وركەنيەتتىڭ اداسۋى» كىتابىنىڭ تۇساۋى كەسىلىپ، «جالىن» جۋرنالىنىڭ 50 جىلدىعى اتالىپ وتكەن بولاتىن.