10:57, 23 - جەلتوقسان 2019 | GMT +5
پوليتسيا قازاقستاندىقتاردان الىس جولعا شىعۋ جوسپارىن شەگەرە تۇرۋدى سۇرايدى
نۇر-سۇلتان. قازاقپارات – ق ر ىشكى ىستەر مينيسترلىگى قازاقستاندىقتاردى الىس ساپارعا شىعۋدى كەيىنگە قالدىرىپ، جول ۇستىندە اسا ساق بولۋىن سۇرايدى، دەپ حابارلايدى قازاقپارات ءتىلشىسى.
«پوليتسەيلەر جۇرگىزۋشىلەرگە كولىك تىزگىنىندە اسا ءجىتى بولۋدى، قاۋىپسىز قاشىقتىق پەن جىلدامدىقتى ساقتاپ، شۇعىل توقتاۋ كەزىندە ساق بولۋدى وتىنەدى. جاياۋ جۇرگىنشىلەردىڭ دە ابايلاعانى ابزال، سەبەبى كوكتايعاق كەزىندە كولىكتەرگە شۇعىل توقتاۋ قيىنعا ءتۇسىپ جاتادى»، - دەگەن جازبا جاريالاندى مينيسترلىكتىڭ Instagram-داعى پاراقشاسىندا.
قاردىڭ قالىڭ تۇسۋىنە بايلانىستى قۇقىق قورعاۋشىلار ازاماتتاردان جوسپارلانعان الىس جولعا ساپارىن شەگەرە تۇرۋدى سۇرايدى. ال ساپارعا شىعۋ مىندەتتى بولعان جاعدايدا قايدا بارا جاتقانىن تۋعان- تۋىستارىنا ايتىپ كەتكەن ءجون.
«جىلدامدىقتى، قاۋىپسىز قاشىقتىق پەن ءبۇيىر جاقتاعى ارالىقتى تاڭداعان كەزدە اۋا رايىنىڭ احۋالىن ەسكەرگەن دۇرىس. قار جاۋىپ تۇرعان كەزدە جولدى كورۋ قيىنداي تۇسەدى»، - دەلىنگەن حابارلامادا.
اۆتور: ايان بەكەن ۇلى
