پوليتسەي اقتۇتەك بوراندا جۇرگىزۋشىلەرگە ەسكەرتۋ ۆيدەوسىن جولدادى

نۇر-سۇلتان. قازاقپارات - اقتۇتەك بوراندا قاتتى جەل مەن بوراعان قارعا قاراماستان جۇرگىزۋشىلەرگە ساق بولۋدى ەسكەرتىپ، جولداعى احۋالعا بايلانىستى ەسەپ بەرگەن پوليتسەيدىڭ ۆيدەوسى جەلىدە جاريالاندى، دەپ حابارلايدى قازاقپارات.

«...اۋدانىندا اۋا رايىنا بايلانىستى جول جابىلدى. جەل وتە قاتتى، اينالا تولىق كورىنبەيدى، سوعان بايلانىستى بارلىق جۇرگىزۋشىلەرگە جولعا شىقپاي ەلدىمەكەندە قالا بەرۋدى سۇرايمىن. قار تازالاۋ جۇمىسىنا «قازاۆتوجولدىڭ» 16 تەحنيكاسى جۇمىلدىرىلعان. قازىرگى ۋاقىتتا جولدى تازارتۋعا مۇمكىندىك جوق، ويتكەنى جولدى قايتادان دەرەۋ قار باسىپ قالىپ جاتىر. جامبىل وبلىسى پوليتسيا دەپارتامەنتىنە قاراستى جول- پاترۋلدىك باتالونىنىڭ 17 ەكيپاجى جۇمىس ىستەۋدە. جولدى تازارتۋ مۇمكىن ەمەس. تاعى ءبىر مارتە قۇرمەتتى جۇرگىزۋشىلەردەن سۇرايتىنىم، جولعا شىقپاي ەلدىمەكەندە بولىڭىزدار»، - دەيدى بەينەروليكتەگى پوليتسەي.

ايتا كەتەرلىگى، 22-جەلتوقساندا جامبىل وبلىسىنىڭ جۋالى اۋدانىندا قار قۇرساۋىندا قالعان 140 ادام قۇتقارىلعان ەدى. 26 كولىك جولدا قالىپ قويعان بولاتىن.

ەسكە سالا كەتسەك، ق ر ىشكى ىستەر مينيسترلىگى قازاقستاندىقتاردى الىس ساپارعا شىعۋدى كەيىنگە قالدىرىپ، جول ۇستىندە اسا ساق بولۋىن سۇرايدى.

بۇگىن جامبىل، قاراعاندى، تۇركىستان وبلىسىنىڭ اۋماعىنداعى جولدار جابىلدى. جەرگىلىكتى توتەنشە جاعدايلار جانە پوليتسيا دەپارتامەنتتەرى جولداردى باقىلاۋعا الىپ، ارنايى كولىك تۇراقتارى مەن جولاۋشىلاردى جىلىتۋ بەكەتتەرىن بەلگىلەدى.

سونىمەن قاتار، 23-جەلتوقساندا تۇركىستان، شىعىس قازاقستان، اقمولا، قىزىلوردا، سولتۇستىك قازاقستان وبلىستارىندا اۋا رايىنىڭ قولايسىزدىعىنا بايلانىستى ەسكەرتۋ جاريالانعان.