بالالارعا ارنالعان جاڭا جىلدىق كوستيۋمدى قالاي تاڭداعان ءجون

نۇر-سۇلتان. قازاقپارات - جاڭا جىل قارساڭىندا ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى اتا-انالارعا جاڭاجىلدىق كوستيۋمدى دۇرىس تاڭداۋعا كەڭەس بەرەدى، دەپ حابارلايدى قازاقپارات ءتىلشىسى.

«ءونىم قاۋىپسىزدىگىنە جۇرگىزىلەتىن مونيتورينگ شەڭبەرىندە 2019 -جىلدىڭ 11 ايىندا بالالار مەن جاسوسپىرىمدەرگە ارنالعان كيىمنىڭ جانە اياق كيىمنىڭ 1545 ۇلگىسى ساتىپ الىنىپ زەرتتەلدى. ونىڭ ىشىندە «بالالار مەن جاسوسپىرىمدەرگە ارنالعان ونىمدەردىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتىنىڭ تالاپتارىنا سايكەس كەلمەيتىن 889 سىناما انىقتالدى، بۇل 57,5 پايىز. ونىڭ ىشىندە ە ا ە و- عا مۇشە مەملەكەتتەردىڭ ءونىمى - 253 (16,4 پايىز)، باسقا ەلدەردىڭ ءونىمى - 611 (39,5 پايىز) ، وتاندىق ونىمدەر - 25 (1,6 پايىز)»، - دەپ حابارلايدى كوميتەت.

حابارلامادا ايتىلعانداي، نەگىزگى ءونىم قاۋىپسىزدىگىن بۇزۋشىلىقتارعا تاڭبالاۋ قاعيدالارىن ساقتاماۋ - 89 پايىز، قاۋىپسىزدىك تالاپتارىنا سايكەس كەلمەۋ - 11 پايىز قۇرايدى.

«انىقتالعان بۇزۋشىلىقتاردىڭ بارلىق فاكتىلەرى بويىنشا كاسىپكەرلىك سۋبەكتىلەرىگە ولاردى جويۋ كەرەكتىگى ءتۇسىندىرىلدى»، - دەلىنگەن اقپاراتتا.

بالالارعا ارنالعان جاڭا جىلدىق كوستيۋمدەردى تاڭداۋ بويىنشا مىناداي كەڭەس بەرىلەدى:

جاڭا جىلدىق كيىم ىڭعايلى بولۋى، قاتتى ىسىتپاۋى جانە توڭدىرماۋى، قاجاماۋى، قىسپاۋى ءتيىس. كيىمدى دايىنداۋعا پايدالانىلاتىن ماتەريال قاۋىپسىز بولۋى كەرەك. ونىڭ قۇرامىندا سينتەتيكا بارىنشا از نەمەسە تابيعي استارىنىڭ بولعانى دۇرىس. ەگەر استارى بولماسا، كوستيۋمنىڭ استىنا ماقتا- ماتا تريكوتاجدان جاسالعان كيىمدى كيۋ كەرەك. بۇل بالانىڭ تەرىسىنە ۇيكەلىپ جايسىزدىقتى بولدىرماۋعا مۇمكىندىك بەرەدى.

ساپالى كارناۆالدىق كوستيۋم، ونىڭ ىشىندە ماسكانىڭ بوتەن جاعىمسىز حيميالىق ءيىسى بولماۋى، سونداي- اق بوياۋدىڭ، جىلتىرلىقتىڭ ىزدەرىن قالدىرماۋى ءتيىس. ساتىپ الۋ الدىندا كوستيۋمنىڭ بەتىن اق ماتامەن ءسۇرتىڭىز. ەگەر بوياۋ ىزدەرى قالسا، بۇيىمنىڭ ءيىسى وتكىر، بەتى جابىسقاق، قاۋىپسىزدىككە جانە كيىمنىڭ ىڭعايلىلىعىنا اسەر ەتەتىن قۇرىلىمدىق ەرەكشەلىكتەرى (وكشەلەرى وتە جوعارى، كوزگە ارنالعان تەسىك كىشكەنتاي، مۇرىنعا نەمەسە اۋىزعا ارنالعان تەسىكتەردىڭ بولماۋى، ەلەمەنتتەرى وتكىر، كەسكىش) بار بولسا، ساتىپ الۋدان باس تارتقان دۇرىس.

بالاعا ارنالعان جاڭا جىلدىق كوستيۋمدى تاڭداۋداعى ايرىقشا تالاپ - تىگۋ ساپاسى مەن فۋرنيتۋراسىنىڭ سەنىمدىلىگى. تىگىستەرى ءتۇزۋ بولۋى، دەنەمەن جاناساتىن رەزەڭكەلەرى مەن ىلگەكتەرى قاجاۋدى بولدىرماۋ ءۇشىن ىشكى پلانكامەن قورعالعان بولۋى ءتيىس. تۇيمەلەرى مەن اكسەسسۋارلارى، اشەكەيلەرى كوستيۋمدە جاقسى بەكىتىلگەن بولۋى كەرەك.

بۇيىم تۋرالى بارلىق اقپارات: دايىنداۋشىنىڭ (دايىنداۋشى ۋاكىلەتتىك بەرگەن تۇلعانىڭ)، يمپورتتاۋشىنىڭ اتاۋى مەن ورنالاسقان جەرى، بۇيىمنىڭ اتاۋى مەن ءتۇرى (ماقساتى)، دايىندالعان كۇنى، تابيعي جانە حيميالىق شيكىزاتتىڭ ءتۇرى مەن ماسسالىق ۇلەسى (پايىزدىق قۇرامى)، پايدالانۋ پروتسەسىندە بۇيىمعا كۇتىم جاساۋ ەرەكشەلىكتەرى بويىنشا كۇتىم جاساۋ بەلگىلەرى (قاجەت بولعان جاعدايدا)، بۇيىمنىڭ ولشەمى، تەرىنى پايدالانۋ كەزىندە - تەرىنىڭ ءتۇرى جانە ونى وڭدەۋ ءتۇرى (بويالعان نەمەسە بويالماعان) كورسەتىلۋى كەرەك تاڭباسىنىڭ بولۋىنا مىندەتتى تۇردە نازار اۋدارىڭىز.

ساتۋشى تۇتىنۋشىنىڭ تالابى بويىنشا ءونىمنىڭ قاۋىپسىزدىگىن راستايتىن تاۋارعا ىلەسپە قۇجاتتامامەن (سايكەستىك سەرتيفيكاتى، سايكەستىك تۋرالى دەكلاراتسياسىمەن) تانىستىرۋعا مىندەتتى. بۇل قۇجاتتار مورمەن راستالۋى ءتيىس.

اۆتور: ءالي يبرايەۆ