مەنىڭ بايلىعىم - مەنىڭ ولمەس ولەڭدەرىم - مۇحتار شاحانوۆ

شىمكەنت. قازاقپارات - شىمكەنتتەگى «وتىرار» كىتاپحاناسىندا قوعام قايراتكەرى، قازاقستاننىڭ حالىق جازۋشىسى، كورنەكتى اقىن مۇحتار شاحانوۆتىڭ شىعارماشىلىق كەشى ءوتتى، دەپ حابارلايدى قازاقپارات ءتىلشىسى.

قالا اكىمى ەرلان ايتاحانوۆتىڭ قولداۋىمەن، ىشكى ساياسات جانە ءدىن ىستەرى جانە مادەنيەت، تىلدەر جانە ارحيۆتەر باسقارمالارىنىڭ ۇيىمداستىرۋىمەن وتكەن «بودەنە تالانتتار مەن قاجىمۇقاندار» اتتى كەش اقىننىڭ شىعارماشىلىعى مەن «جالىن» جۋرنالىنىڭ 50 جىلدىعىنا ارنالدى.

ق ر پرەزيدەنتى قاسىم-جومارت توقايەۆ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى حالىققا جولداۋىندا «ەلىمىزدە تانىمال تۇلعالاردىڭ ەڭبەكتەرىن حالىق اراسىندا دارىپتەۋىمىز كەرەك» دەپ اتاپ كورسەتكەن بولاتىن.

وسى رەتتە ۇيىمداستىرىلعان قازاقتىڭ ايگىلى اقىنى، قازاقستاننىڭ حالىق جازۋشىسى مۇحتار شاحانوۆتىڭ كەشىندە «زابلۋجدەنيە تسيۆاليزاتسيي» اتتى جاڭا كىتابىنىڭ تۇساۋى كەسىلدى. كەش قوناقتارى جازۋشى «قۇرمەت» وردەنىنىڭ يەگەرى مارحابات بايعۇت، جازۋشى «جالىن» جۋرنالى باس رەداكتورىنىڭ ورىنباسارى قۇديار ءبىلال، قازاقستان رەسپۋبليكاسىنىڭ مادەنيەت قايراتكەرى زىليحا جانتاسوۆا جانە «وتىرار القابى» گازەتىنىڭ باس رەداكتورى الماس اقىلبەك ءسوز سويلەپ، ەستەلىكتەرمەن ءبولىستى.

قالىڭ وقىرمانعا جول تارتقالى وتىرعان جاڭا تۋىندىنى تالداپ، پىكىر قالدىردى.

ءوز كەزەگىندە كەش كەيىپكەرى اقىن، جازۋشى مۇحتار شاحانوۆ ءسوز الىپ، كوپشىلىك جۇرتقا ىستىق ىقىلاسىن ءبىلدىردى.

«مەن، قازاقستانداعى ەڭ سوڭعى، ەڭ ناشار اقىنمىن. سەبەبى، مەن تەك شىندىقتى ايتاتىن، تۋرا سويلەيتىن اداممىن. ەشقاشاندا جاعىمپازدىق جاساعان ەمەسپىن. ەڭبەگىم ءۇشىن 120 مەملەكەتتەن سىيلىق الدىم. ءبىراق، بايلىققا قىزىققان ەمەسپىن. مەنىڭ بايلىعىم سول - قازاق ءتىلى، ءدىلى، ءدىنى، مەنىڭ ولمەس ولەڭدەرىم»، - دەدى.

باس قوسۋدا سونداي-اق، قالامگەردىڭ «رۋح پەن ءتىل»، «ەرلەردى ەرلىككە شاقىرۋ» سىندى اندەرى ورىندالدى. «ءتورت انا»، « ايەلدەر باللاداسى» سىندى ولەڭدەرى وقىلدى. قالىڭ وقىرمان اقىننىڭ جىگەرلى، پاتريوتتىق ولەڭدەرىمەن سۋسىندادى. قوعام قايراتكەرىنىڭ قازاق حالقى ءۇشىن ەڭبەگى ەرەن ەكەنى ايتىلدى. سەبەبى، ول الەم نازارىن تارتىلعان ارال تەڭىزىنە اۋدارىپ، دۇنيەجۇزىلىك دەڭگەيگە كوتەردى. جەلتوقسان وقيعاسىن زەرتتەۋ جونىندە كوميسسيا قۇرىلىپ، سونىڭ مۇشەسى بولدى. ناۋرىز مەيرامىنىڭ حالىقپەن قاۋىشۋىنا مۇرىندىق بولدى.

كەش بارىسىندا اقىننىڭ ولەڭدەرىنەن ءۇزىندى وقىعان بۇلدىرشىندەر جيىننىڭ شىرايىن اشتى.