جەردى بوس جاتقىزباي، حالىق يگىلىگىنە جاراتۋ قاجەت - يمانعالي شونكەنوۆ

كوكشەتاۋ. قازاقپارات - جەردى بوس جاتقىزباي، ونى حالىق يگىلىگىنە جاراتۋ قاجەت.

اقمولا وبلىسىنداعى «اگروفيرما Green Star»  جاۋاپكەرشىلىگى شەكتەۋلى سەرىكتەستىگىنىڭ ديرەكتورى يمانعالي شونكەنوۆ ۇلتتىق كەڭەستىڭ ەكىنشى وتىرىسىنداعى مەملەكەت باسشىسىنىڭ تاپسىرمالارىنا قاتىستى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.

يمانعالي شونكەنوۆتىڭ ايتۋىنشا، مەملەكەت باسشىسى ۇلتتىق كەڭەستە سويلەگەن سوزىندە جەردى ءتيىمدى پايدالانۋدىڭ جاڭا مۇمكىندىكتەرى تۋرالى ايتىپ قانا قويماي، ەڭ الدىمەن ناقتى مىندەتتەردى ايقىنداپ بەردى.

«مەملەكەت باسشىسى ءوز سوزىندە: «كوكەيتەستى ماسەلەنىڭ ءبىرى - جەر جانە ونى ءتيىمدى پايدالانۋعا قاتىستى. جاقىندا اقمولا وبلىسىنا جاساعان ساپارىمدا اۋىل شارۋاشىلىعى ماقساتىنداعى جەردى ءتيىمسىز پايدالانۋ جايىنا نازار اۋداردىم. بۇل باعىتتا، مەنىڭ ۇستانىمىم - بەكەم: جەردى يگەرە الاتىن ادام عانا ونىڭ يەسى بولۋعا لايىق»، - دەپ اتاپ ءوتتى.

راسىندا دا، بۇگىنگى كۇنى جەر ماسەلەسى كەز كەلگەن قازاقستاندىقتى تولعاندىرادى. پرەزيدەنتتىڭ جەردى ءتيىمدى پايدالانۋ تۋرالى مىندەتتەرى مەنىڭ ويىمشا، وتە ماڭىزدى. جالپى، جەردى بوس جاتقىزباي، ونى حالىق يگىلىگىنە جاراتۋ قاجەت. جەردى ءتيىمدى پايدالانۋ ارقىلى ورگانيكالىق جانە ەكولوگيالىق تازا ءونىم ءوندىرۋدىڭ الەۋەتىن ىسكە اسىرۋعا بولادى. بۇل اقمولا وبلىسى ءۇشىن وتە ماڭىزدى، ويتكەنى، ءبىزدىڭ قاسىمىزدا نۇر-سۇلتان مەگاپوليسى بار جانە ەلورداعا جەتكىزىلىم كولەمىن ۇلعايتۋ مىندەتى تۇر»، - دەيدى ي. شونكەنوۆ.

وسى رەتتە، ول مەملەكەت باسشىسى ۇكىمەتكە ءتيىستى قۇقىقتىق اكتىلەردى جەدەل قابىلداپ، يگەرىلمەي، بوس جاتقان جەرلەردى ەكونوميكالىق اينالىمعا ەنگىزۋ شارالارىن قولعا الۋى تۋرالى تاپسىرماسىنىڭ اۋىل شارۋاشىلىعى سالاسىنىڭ دامۋىنا سەرپىن بەرەتىنىنە توقتالدى.

«اۋىل شارۋاشىلىعى تاۋارلارىن ءوندىرۋشى رەتىندە ەكسپورتقا باعىتتالىپ، ءونىم كولەمىن ۇلعايتۋ باعىتىندا جۇمىس ىستەيتىن بولامىز. ءبىزدىڭ قولدان سۋارۋدى دامىتۋدا الەۋەتىمىز زور. پرەزيدەنتتىڭ تاپسىرماسىنا سايكەس، 2030-جىلعا دەيىن ىلعالداندىرۋ ارقىلى سۋارىلاتىن ەگىستىكتىڭ كولەمىن رەسپۋبليكا بويىنشا 3 ميلليون گەكتارعا دەيىن جەتكىزۋ جوسپاردا بار. بۇل مال شارۋاشىلىعى مەن وسىمدىك شارۋاشىلىعىن قارقىندى دامىتۋعا مۇمكىندىك بەرمەكشى.

ءبىزدىڭ كومپانياعا سەلينوگراد اۋدانىنىڭ قابانباي باتىر سەلولىق وكرۋگى اۋماعىندا ورنالاسقان «اگروفيرما Green Star»  مەن «اگرو پارك» سەرىكتەستىكتەرى كىرەدى. «اگروفيرما Green Star»  سەرىكتەستىگى جىل سايىن 1200 گەكتار جەرگە اگروتەحنيكالىق جۇمىستارىن جۇرگىزىپ، نۇر-سۇلتان قالاسىن ساپالى تابيعي كوكونىسپەن قامتاماسىز ەتىپ كەلەدى.

ءسوزىمنىڭ سوڭىندا ايتارىم، مەملەكەت باسشىسىنىڭ ۇلتتىق كەڭەستە جەردى راتسيونالدى پايدالانۋدى باقىلاۋدى قاتايتۋ، پايدالانىلماي جاتقان جەرلەرگە سالىناتىڭ سالىقتىڭ كولەمىن ۇلعايتۋ ماڭىزدى قادام دەۋ كەرەك. ويتكەنى اۋىل شارۋاشىلىعى سالاسىنىڭ دامۋى مەن ەلىمىزدىڭ الەۋمەتتىك-ەكونوميكالىق وركەندەۋى وسىعان تىكەلەي بايلانىستى»، - دەپ تۇيىندەدى ي. شونكەنوۆ.