ماجارلار ەجەلگى تۇركىلەردىڭ كاراچۋن مەرەكەسىن اتاپ ءوتتى
كاراچۋن ەڭ كونە ەۋرازيالىق ادەت-عۇرىپ بولىپ سانالادى، وسى ورايدا قىسقى كۇن توقىراۋى مەيرامى تويلانادى. كاراچۋندى «قارا ءتۇن»، سونداي-اق «قارا شىڭ» دەپ تۇسىندىرۋگە بولادى.
وسى مەرەكە اياسىندا قاتتى ايازدى ءتۇندى وتكەرگەننەن كەيىن، ۇلكەن الاۋ جاعىلىپ، ونىڭ شوعىمەن جەردى قىزدىرعان. وسىدان سوڭ كەلەسى كۇنى جاڭا كەزەڭ باستالدى دەپ ەسەپتەلگەن. ياعني، ءتۇن بىرتىندەپ قىسقارىپ، تابيعات جاڭا كەزەڭگە ءوتىپ، بۇل مەرزىم ناۋرىزعا دەيىن جالعاسادى.
بۇگىندە كاراچۋن ماجار ەلىندە اتاپ وتىلۋدە. ولار ەجەلگى تۇركى سوزىنە سۇيەنە وتىرىپ، «كاراچون» دەيدى.
مەرەكە باعدارلاماسى بويىنشا، ماجارلار بۇكىل ەل اۋماعىندا ۇلكەن الاۋ جاعىپ، شامان اندەرىن شىرقايدى. بۇل ءراسىمنىڭ ءمانى - جارىق ساۋلەنىڭ جىلدىڭ ەڭ ۇزاق ءتۇنىن تەزىرەك جەڭىپ، قايتا جارقىراۋىنا جاردەمدەسۋدە.
ايتا كەتەيىك، «ماديار-تۇران» قورى سوڭعى جىلدارى ءداستۇرلى تۇردە كاراچۋندى مەرەكەلەۋدى ۇيىمداستىرىپ كەلەدى.
