تەز ازىرلەنەتىن تاعامنىڭ زيان ەكەنىن كوپشىلىك بىلە بەرمەيدى - سالا ماماندارى

شىمكەنت. قازاقپارات - شىمكەنتتە قالا اكىمىنىڭ جانىنداعى حالىق دەنساۋلىعىن قورعاۋ ماسەلەلەرى جونىندەگى ۇيلەستىرۋ كەڭەسىنىڭ وتىرىسى ءوتتى، دەپ حابارلايدى قازاقپارات ءتىلشىسى.

جيىنعا كەڭەس مۇشەلەرى مەن قالاداعى بارلىق مەديتسينالىق ۇيىمداردىڭ باسشىلارى قاتىسىپ، تۋبەركۋلەز اۋرۋىنىڭ قازىرگى جاعدايى مەن الدىن الۋ ءىس-شارالارىن تالقىلادى

كەڭەستە قالا بويىنشا تۋبەركۋلەز اۋرۋشاڭدىعىن تومەندەتۋدە اتقارىلعان جۇمىستار بارىسى باياندالىپ، بۇگىنگى كۇنى شەشىمىن تاپپاي وتىرعان وزەكتى ماسەلەلەر ءسوز بولدى.

سالا ماماندارى جەرگىلىكتى اتقارۋشى ورگاندار مىندەتتى تۇردە باتسيلليارلى تۋبەركۋلەز تۇرىمەن اۋىراتىن ناۋقاستارعا الەۋمەتتىك كومەك كورسەتۋ قاجەتتىلىگىن، ولارمەن قارىم-قاتىناستا بولعان جانە اۋرۋ جۇقتىرعان مەكتەپ جاسىنداعى بالالاردى حيميالىق پروفيلاكتيكا ەم-دومىن قابىلداۋ كەزىندە ىستىق تاماقپەن قامتاماسىز ەتۋ ماسەلەسىن ايتىپ ءوتتى. سونىمەن قاتار دۇرىس تاماقتانۋ يندۋسترياسىن دامىتۋداعى وزەكتى پروبلەمالار تالقىلاندى. مامانداردىڭ ايتۋىنشا، سوڭعى كەزدە جاستار تەز دايىندالاتىن تاعامداردىڭ ءجيى تۇتىنادى. الايدا ولاردىڭ زيانىن بىلمەي، كوپ قولدانىپ جاتادى.

مۇنداي تاعامداردىڭ قاتارىندا فاستفۋد، دونەر، ءار ءتۇرلى گامبۋرگەر، شاۋرما، لاۆاش، پيتستسا، قۋىرىلعان قىتىرلاق كارتوپ، جانە ت. ب. بار. سونىمەن قاتار، وسىنداي تاعامداردى دايىندايتىن ورىندار سانى دا جىل سايىن ءوسىپ كەلەدى. كوبىنە قوعامدىق تاماقتانۋ ورىندارىندا مايلى، كالورياسى، تۇزى كوپ تاعامدار دايىندالادى. بۇل حالىق اراسىندا سوزىلمالى ينفەكتسيالىق ەمەس اۋرۋلاردىڭ (قان اينالىمى اۋرۋلارى، قانت ديابەتى، سەمىزدىك، ت. ب.) ءوسۋىنىڭ بىردەن-ءبىر سەبەپشىسى بولىپ وتىر.

وسىعان بايلانىستى مەملەكەتتىك-جەكەشەلىك سەرىكتەستىكتى قولدانىپ تەز دايىندالاتىن تاعامدار ورنىنا سالاۋاتتى تاماقتانۋ يندۋسترياسىن دامىتۋ قاجەتتىگى تۋىپ تۇر. سول ارقىلى وتباسىعا ارنالعان مەيرامحانا، ديەتالىق اسحانا قاجەتتىلىگى، بايىتىلعان ۇندى كەڭ قولدانۋ ماسەلەسى ايتىلدى. ونى حالىق اراسىندا ءتۇسىندىرۋ جۇمىستارىن كەڭ كولەمدە، بۇقارالىق اقپارات قۇرالى كومەگىن قولدانا وتىرىپ جۇرگىزۋ ۇسىنىلدى.

باس قوسۋدا سونداي-اق، حالىقتى سپورتپەن اينالىسۋعا تارتۋ مەن مەكتەپ وقۋشىسىنىڭ دەنە بەلسەندىلىگىن ارتتىرۋ جايى قامتىلدى. وتىرىس قورىتىندىسىندا ۇيلەستىرۋ كەڭەسىنىڭ ءتوراعاسى جانە قاتىسۋشىلار ۇسىنىستارىن بەرىپ، ءتيىستى شەشىمدەر شىعارىلدى. جاۋاپتى سالا باسشىلارىنا تاپسىرمالار بەرىلدى.