جاقسىلىق ۇشكەمپىروۆ تۋرالى كوركەم فيلمنىڭ تۇساۋكەسەرى ءوتتى
فيلمنىڭ قويۋشى رەجيسسەرى ءارى سەناري اۆتورى - باقىت قايىربەكوۆ. كوركەم فيلمدى تاماشالاۋعا جينالعان كورەرمەن كينوتەاتر زالىندا بوس ورىن قالدىرمادى. ءتىپتى جينالعاندار ءبىرازى فيلمدى تۇرەگەپ تۇرىپ تاماشالادى. ال كورسەتىلىمنىڭ سوڭىندا ولار ۇزاق ۋاقىت قول سوقتى.
ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق جانە Mergen studio كومپانياسى تۇسىرگەن بيوگرافيالىق فيلم قازاقستاننىڭ ەڭبەك ەرى، گرەك-ريم كۇرەسىنىڭ پالۋانى، الەم چەمپيونى، وليمپيادا چەمپيونى، س س س ر- عا ەڭبەك سىڭىرگەن سپورت شەبەرى، قازاق س س ر ەڭبەك سىڭىرگەن جاتتىقتىرۋشىسى - جاقسىلىق ۇشكەمپىروۆتىڭ ءومىرى تۋرالى باياندايدى.
فيلمنىڭ تۇساۋكەسەرىنە ق ر مادەنيەت جانە سپورت ۆيتسە-ءمينيسترى ۇركەن بيساقايەۆ، قازاقستاننىڭ ەڭبەك سىڭىرگەن قايراتكەرى، «قازاق فيلم» كينوستۋدياسىنىڭ پرەزيدەنتى ارمان اسەنوۆ، رەجيسسەر باقىت قايىربەكوۆ باستاعان فيلمنىڭ ءتۇسىرۋ توبى جانە جاقسىلىق ۇشكەمپىروۆتىڭ ءوزى قاتىستى.
«بۇگىن قازاق كينوسى ءۇشىن ايتۋلى كۇن - بۇگىن ءبىز نازارلارىڭىزعا قازاقتىڭ باعىنا بىتكەن باتىرى - جاقسىلىق ۇشكەمپىروۆتىڭ ءومىرى مەن سپورتتاعى جولىنا ارنالعان كوركەم فيلمدى ۇسىنىپ وتىرمىز. جاقسىلىق اعامىزدى بىلمەيتىن قازاق جوق. سوۆەت زامانىندا جاۋىرىنى جەر يىسكەمەگەن بالۋاننىڭ سپورتتاعى جەتىستىكتەرى جىلنامادا جازۋلى. بەرەكەلى ىسىمەن دە، جايدارى-جايساڭ مىنەزىمەن دە كوپشىلىكتىڭ ىقىلاسىنا بولەنگەن اعامىزدىڭ سپورتتاعى جەتىستىكتەرى مەن يگىلىكتى ىستەرى وزگەلەرگە، اسىرەسە كەلەشەك ۇرپاققا ۇلگى بولارلىق»، - دەدى ق ر مادەنيەت جانە سپورت ۆيتسە-ءمينيسترى ۇركەن بيساقايەۆ.
«قازاق فيلمنىڭ» پرەزيدەنتى ارمان اسەنوۆ اتى اڭىزعا اينالعان بالۋاننىڭ ءومىر جولى مەن سپورتتاعى جەتىستىگىنە ارنالعان فيلمنىڭ تۇساۋكەسەرىنە وسىنشاما حالىق كەلگەنىنە وتە قۋانىشتى ەكەنىن جەتكىزدى.
«قازاق سپورت تاريحىندا ويىپ الار ورنى بار، ءومىرىن سپورتقا ارناعان اعامىز قايتسەم دە چەمپيون بولامىن دەپ الدىنا ماقسات قويدى جانە وعان جەتۋ جولىندا ايانباي تەر توگىپ، قاجىرلى ەڭبەك ەتتى. سوندىقتان دا بۇل فيلم جاس ۇرپاقتى تاربيەلەۋدە، ولاردىڭ بويىنداعى پاتريوتتىق سەزىمدى وياتۋدا ۇلگى بولار دۇنيە»، - دەدى ارمان اسەنوۆ.
رەجيسسەر باقىت قايىربەكوۆتىڭ ايتۋىنشا، بۇل ونىڭ كوركەم فيلم جانرىندا تۇسىرگەن مەنىڭ العاشقى تۋىندىسى ەكەن.
«كارتينا 48 كەلى سالماقتاعى وليمپيادا چەمپيونى بولعان العاشقى قازاق - جاقسىلىق ۇشكەمپىروۆ تۋرالى. ول ءتۇرلى مەملەكەت دارەجەسىندەگى جارىستارعا قاتىسىپ، جۇلدەلى ورىنداردان كورىنسە دە، سپورتشىعا حالىقارالىق ارەنالارعا شىعۋعا مۇمكىندىك بەرمەگەن. تەك 1980-جىلى عانا ول ماسكەۋدە وتكەن وليمپيادا ويىندارىنا قاتىسۋعا جولداما الىپ، الەمدىك دەڭگەيدە ونەرىن كورسەتە الدى. فيلم وڭتۇستىك قازاقستان اۋىلدارىنىڭ بىرىندە دۇنيەگە كەلگەن سپورتشىنىڭ بالالىق شاعىنان باستاپ، وليمپيادا ويىندارىندا جەتكەن جەتىستىكتەرىنە دەيىنگى ءومىر جولىن بەينەلەيدى»، - دەدى رەجيسسەر.
جاقسىلىق ۇشكەمپىروۆ فيلمنىڭ ءتۇسىرۋ توبىنا، اكتەرلەرگە العىس ايتتى.
«بۇل فيلم مەن ءۇشىن ەمەس، كەلەشەك ۇرپاق ءۇشىن كەرەك. مەنىڭ جولىمدى قۋعان وليمپيادا چەمپيوندارى كوپ بولسىن دەپ تىلەيمىن»، - دەدى جاقسىلىق ۇشكەمپىروۆ.
دايىندىق كەزەڭدە ۇيىمداستىرىلعان كاستينگ ناتيجەسىندە جاقسىلىق ۇشكەمپىروۆتىڭ جاستىق شاعى مەن ەر جەتكەن كەزىن ەلنار نازارقۇل، ءسانۇرجان سۇلەيمەنوۆ جانە تەاتر اكتەرى ولجاس ساق سومدادى. ال 60 جاستاعى سپورتشىنىڭ رولىنە قازاقستاننىڭ حالىق ءارتيسى، جەزقازعان تەاترىنىڭ اكتەرى دوسجان جانبوتايەۆ شاقىرىلعان.
ايتا كەتسەك، سپورتتىق دراما وسكەمەندە، الماتىدا جانە الماتى وبلىسىندا ءتۇسىرىلدى. 1980-جىلى ماسكەۋدە وتكەن وليمپيادا ويىندارىنىڭ ساحنالارى تالدىقورعان قالاسىنداعى «جاستار» سپورت سارايىندا، سونداي-اق مينسكىدەگى (بەلارۋس رەسپۋبليكاسى) «دينامو» ستاديونىندا ءتۇسىرىلدى. ال سپورتشىلارعا ارنالعان وليمپيادا اۋىلىن كورسەتۋ ءۇشىن تۇسىرىلىمدەر بەلارۋس ەلىندەگى «ستايكي» اتتى رەسپۋبليكالىق وليمپيادالىق دايارلاۋ ورتالىعىندا وتكىزىلدى.
