ق ر پرەزيدەنتىنىڭ تاپسىرماسى: تابىسى از وتباسىلاردىڭ بالالارىنا قانداي كومەك جاسالادى؟

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ تابىسى از وتباسىلاردىڭ بالالارىن قولداۋ ماسەلەسىنە ايرىقشا نازار اۋدارۋدا.

بۇل تۇرعىدا مەملەكەت باسشىسىنىڭ سايلاۋالدى باعدارلاماسى مەن قازاقستان حالقىنا جولداۋىندا ەرەكشە ەكپىن قويىلدى. جالپى، 20- جەلتوقسان كۇنى ەلوردادا وتكەن ۇلتتىق قوعامدىق سەنىم كەڭەسىنىڭ ەكىنشى وتىرىسىندا وسى الەۋمەتتىك باعىتتاعى قادامدار مەن شارالارعا ناقتى تۇسىنىك بەرىلدى.

ايتا كەتەيىك، بۇگىندە پرەزيدەنتتىڭ الەۋمەتتىك باستامالارى ەگجەي- تەگجەيلى پىسىقتالىپ، قوعامدا بۇل قادامدار كەڭىنەن تالقىعا ءتۇستى. دەگەنمەن دە جۇرتشىلىق اراسىندا بۇل وڭتايلى شارالاردى تۇسىنىسپەۋشىلىك جاعدايلارى دا ورىن الىپ جاتادى. وسى ورايدا «قازاقپارات» اگەنتتىگى كەپىلدەندىرىلگەن تارتىپتە حالىقتىڭ وسال توپتارى اراسىنداعى بالالارعا قانداي الەۋمەتتىك كومەك جاسالاتىنىن كوپشىلىك نازارىنا ۇسىنۋدى ءجون كوردى.

اتاپ ايتقاندا، قاسىم-جومارت توقايەۆتىڭ ۇلتتىق قوعامدىق سەنىم كەڭەسىنىڭ ەكىنشى وتىرىسىندا سويلەگەن ءسوزى «يگىلىك بارشاعا! ساباقتاستىق. ادىلدىك. ورلەۋ» اتتى سايلاۋالدى باعدارلاماسىندا جانە «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىندا كوتەرىلگەن باستامالارمەن ءوزارا بايلانىستى.

پرەزيدەنت ءوز جولداۋىندا از قامتىلعان جانە كوپبالالى وتباسىلاردى قولداۋ ءۇشىن ۇكىمەتكە دارىندى بالانىڭ قابىلەتىن دامىتۋدىڭ جول كارتاسىن ازىرلەۋ تاپسىرماسىن، جاس وسپىرىمدەر اراسىندا سۋيتسيد ماسەلەسىمەن ماقساتتى تۇردە اينالىسۋ قادامىن، زورلىق- زومبىلىقتان زارداپ شەككەن بالالار مەن ولاردىڭ وتباسىن قورعاۋ جونىندە تولىققاندى باعدارلاما ازىرلەۋ قاجەتتىگىن، بتسپ دياگنوزى بار بالالارعا مەديتسينالىق جانە الەۋمەتتىك قولداۋ كورسەتۋدى جاقسارتۋ ءۇشىن شارالار قابىلداۋ تاپسىرماسىن، سونداي-اق بالالارعا قولجەتىمدى بولۋى ءۇشىن شاعىن جانە ورتاشا وڭالتۋ ورتالىقتارىنىڭ جەلىسىن كەڭەيتۋ شارالارىن اتاپ وتكەن بولاتىن. سونىمەن قاتار، وسى باستامالار مەملەكەت باسشىسىنىڭ سايلاۋ الدىنداعى باعدارلاماسىندا دا قامتىلعان ەدى. جالپى، بۇل اۋقىمدى شارالاردى جۇزەگە اسىرۋ ءۇشىن قوماقتى قارجى قاراستىرىلىپ وتىر.

سوندىقتان ۇلتتىق كەڭەستىڭ ەكىنشى وتىرىسىندا دا قاسىم-جومارت توقايەۆ تابىسى از وتباسىلاردىڭ بالالارى ناقتى قولداۋ شارالارىمەن قامتىلاتىنىن ايتتى.

مەملەكەت باسشىسى الەۋمەتتىك رەفورمالار تۋرالى ايتا كەلىپ، كوپبالالى وتباسىلارعا بەرىلەتىن اتاۋلى الەۋمەتتىك كومەك ماسەلەسى ءالى دە وزەكتى بولىپ وتىر دەپ سانايدى.

ايتا كەتەيىك، ۇكىمەتتىڭ الدىنا اشىق ءارى ءادىل اتاۋلى كومەكپەن قامتاماسىز ەتۋ مىندەتى قويىلدى. پرەزيدەنت مەملەكەتتىڭ تەك مۇقتاج جاندارعا عانا جاردەم بەرۋى ءتيىس ەكەنىن جەتكىزدى.

بۇل تۇرعىدا حالىقتىڭ الەۋمەتتىك وسال توپتارى اراسىنداعى بالالارعا كەپىلدەندىرىلگەن الەۋمەتتىك كومەكتىڭ تولىق پاكەتى قامتىلعان. بۇگىندە ۇكىمەت جاڭا قادامداردى ازىرلەپ، ءتيىستى زاڭ جوباسىن دا دايارلادى.

1. 2020-جىلعى 1- قاڭتاردان باستاپ كامەلەتكە تولماعان 4 جانە ودان دا كوپ بالالارى بار وتباسىلارعا مەملەكەتتىك جاردەماقى تولەۋ ەسكەرىلگەن.

سارالانعان مولشەردەگى جاڭا مەملەكەتتىك جاردەماقى كوپبالالى وتباسىلارعا تابىسىنا قاراماستان تولەنەدى دەپ جوسپارلانۋدا.

«كوپبالالى وتباسىلارعا جاڭا مەملەكەتتىك جاردەماقىنى ديففەرەنتسيالدى، ياعني ايلىق ەسەپتىك كورسەتكىشتىڭ 42,5 مىڭ تەڭگەدەن 74 مىڭ تەڭگەگە دەيىنگى ەسەلەنگەن ولشەمىمەن بەرىلمەك»، - دەدى قاسىم-جومارت توقايەۆ.

2. سونىمەن قاتار، جاعدايى تومەن وتباسىلاردىڭ بالالارىنا كەپىلدەندىرىلگەن الەۋمەتتىك پاكەت جاساقتالادى. بۇل رەتتە كەپىلدى الەۋمەتتىك پاكەتتى ۇسىنۋ اياسىندا 1 جاستان 6 جاسقا دەيىنگى تابىسى از وتباسىلارىنىڭ بالالارى قامتىلماق.

ۇلتتىق كەڭەس وتىرىسىندا پرەزيدەنت مەكتەپ جاسىنا دەيىنگى بالالار ازىق-تۇلىك جيىنتىعىمەن جانە ەڭ قاجەتتى دەگەن قۇرال-جابدىقتارمەن قامتىلاتىنىن ايتتى.

3. 6 جاستان 18 جاسقا دەيىنگى تابىسى از وتباسىلارىنىڭ بالالارىن مەكتەپتە ىستىق تاماقپەن، وقۋ قۇرالدارىمەن جانە مەكتەپ فورماسىمەن قامتاماسىز ەتۋ قاراستىرىلعان.

«وقۋشىلار مەكتەپتە ىستىق تاماقتى تەگىن ىشەدى، مەكتەپكە بارىپ-قايتۋ جولاقىسى، سونداي-اق، مەكتەپ فورماسى مەن وقۋ قۇرالدارى تەگىن بولادى. وسىنىڭ بارلىعى مەملەكەت ەسەبىنەن»، - دەپ ناقتىلادى مەملەكەت باسشىسى.

مۇنىمەن قوسا، ق. توقايەۆ اتا-اناسىنىڭ قامقورلىعىنسىز قالعان بالالارعا كەشەندى الەۋمەتتىك-پاتروناتتىق قولداۋدى كۇشەيتۋ كەرەكتىگىن قاداپ ايتتى.

وسىلايشا، اتاۋلى الەۋمەتتىك كومەكتىڭ قولدانىستاعى تەتىكتەرىنە ايتارلىقتاي تۇزەتۋلەر ەنگىزىلەدى. ناتيجەسىندە، ەڭبەك ەتۋگە ىنتالاندىرۋدىڭ جاڭا تاسىلدەرىنە باسا ءمان بەرىلىپ، اتاۋلى الەۋمەتتىك كومەكتى اسىرا پايدالانۋ بارىنشا ازايادى.