پرەزيدەنت قوعامنىڭ تالاپ-تىلەگىن ەسكەرىپ وتىر - الۋا جولدىبالينا
«ەكىنشى ۇلتتىق كەڭەس وتىرىسى مەن ءبىرىنشى وتىرىس اراسىنداعى ۋاقىت تىعىز بولسا دا ءاربىر جۇمىس توبى ءوز باعىتتارى بويىنشا ۇسىنىستارىن بەرگەن. سول ۇسىنىستاردىڭ باسىم بولىگى رەفورمالاردىڭ قاتارىنا كىرگەن. ياعني، بۇل جۇمىس وسىمەن توقتاپ قالماي، جالعاسىن تابادى دەگەندى بىلدىرەدى»، - دەيدى الۋا جولدىبالينا.
ونىڭ ايتۋىنشا، پرەزيدەنت ءبىرقاتار تاپسىرما بەرۋ ارقىلى قوعامنىڭ تالاپ-تىلەكتەرىن ەسكەرىپ وتىرعانىن كورسەتتى.
«ساياسي جۇيەدە «مۇددەلەردىڭ ارتيكۋلياتسياسى»، «مۇددەلەردىڭ اگرەگاتسياسى«دەگەن تۇسىنىك بار. ياعني، ساياسي جۇيە ءوزىن قورشاعان قوعامنان ءارتۇرلى يپۋلس - تالاپ-تىلەكتەر الادى. ونىڭ ءبارى جينالىپ مۇددەلەردىڭ ارتيكۋلياتسىنا اينالادى. مىسالى، بۇگىن پرەزيدەنتتىڭ ايتقان تاپسىرمالارى، ۇسىنىستارى قوعامداعى الەۋمەتتىك توپتاردىڭ، قوعامدىق ۇيىمداردىڭ، ازاماتتىق قوعام سەكتورىنىڭ مۇددەسىن ەسكەرگەنىن كورسەتەدى»، - دەيدى ول.
سونداي-اق، ول بيلىك كەتكەن ولقىلىقتاردان ساباق العانىن ايتتى.
«بۇگىن پرەزيدەنت ساياسي جاڭعىرۋعا كوبىرەك توقتالدى. بۇل - العاشقى ناتيجە عانا. الەۋمەتتىك سالا بويىنشا ايتار بولساق، كوپبالالى وتباسىلارعا تولەماقى كىرىسكە بايلانىستى ەمەس، بالانىڭ سانىنا بايلانىستى بەرىلەدى. بۇل بيلىكتىڭ اتاۋلى الەۋمەتتىك كومەك بويىنشا كەتكەن ولقىلىقتاردان وي تۇيگەندىكتەرىن، ۇستانىمدارىن كورسەتىپ وتىر. كەز كەلگەن ەنگىزىلگەن جاڭعىرتۋ ارى قاراي وزگەرەدى، جاڭارادى، سەبەبى بيلىك تە كەتكەن ولقىلىقتان قورىتىندى شىعاراتىنىن، ارى قاراي جۇمىس ىستەۋگە دايىن ەكەنىن كورسەتىپ وتىر. ۇكىمەتكە اتقارۋشى بيلىك رەتىندە كوپ مىندەت، جاۋاپكەرشىلىك جۇكتەلەدى. بارلىق رەفورمالاردى دايىنداعان كەزدە زاڭناما دايىنداپ، ءىس-شارالاردى قامتىپ، بيۋجەتكە وزگەرىس ەنگىزۋ كەرەك. مۇنىڭ ءبارى ۇكىمەتكە ۇلكەن مىندەت ارتىلادى دەگەندى بىلدىرەدى»، - دەيدى ءبولىم باسشىسى.
