شۆەيتساريا اتوم ەلەكتر ستانتسياسىنان باس تارتا باستادى
وسىلايشا، ەۋروپالىق ەل يادرولىق ەنەرگەتيكادان باس تارتۋ پروتسەسىن باستاپ كەتتى، دەپ حابارلايدى قازاقپارات ءتىلشىسى Reuters اگەنتتىگىنە سىلتەمە جاساپ.
قۋاتى 373 مەگاۆاتت بولاتىن ستانتسيا 1973-جىلى اشىلعان. كورشىلەس بەرن قالاسىنىڭ 100 جىل بويى ەنەرگەتيكالىق قاجەتتىلىگىن جاۋىپ تۇرارلىق قۋات ءوندىرىپ كەلگەن.
ميۋلەنبەرگ ا ە س- ى شۆەيتساريانىڭ بەس بىردەي اتوم ستانتسياسىنىڭ ءبىرى. 2017-جىلعى يادرولىق ەنەرگەتيكادان باس تارتۋ تۋرالى رەفەرەندۋمنان كەيىن جابىلعان العاشقى ستانتسيا بولماق. سودان بەرى مەملەكەت كۇن، جەل جانە گيدروەنەرگەتيكانىڭ ۇلەسىن بارىنشا ارتتىرىپ كەلەدى.
شۆەيتسارياعا كورشىلەس گەرمانيا اتوم ەلەكتروستانتسياسىنان 2022-جىلى باس تارتۋى كەرەك. سونىمەن بىرگە، شۆەيتساريا بيلىگى جاڭا يادرولىق رەاكتورلاردى سالمايتىنىن، ال قالعان ستانتسيالاردى قىزمەت ەتۋ ۋاقىتى اياقتالعاننان كەيىن جاباتىنىن جاريا ەتتى.
شۆەيتسارياداعى قالعان ەلەكترو ستانتسيالاردىڭ ناقتى قاشان جابىلاتىنى بەلگىسىز. ايتسە دە، جۇمىسىن توقتاتاتىن كەلەسى ستانتسيا - گەرمانيامەن شەكاراداعى 1969-جىلى سالىنعان بەتسناۋ بولۋى مۇمكىن.
2017-جىلى شۆەيتساريالىق اتوم ەلەكتروستانتسيالارى ەلدەگى ەلەكتردىڭ ۇشتەن ءبىرىن ءوندىرىپ كەلگەن. ال ەلەكتردىڭ 60 پايىزى گيدروەلەكتروستانتسيالارعا تيەسىلى. ال بالامالى قۋات كوزدەرىنىڭ ۇلەسى - 5 پايىز.
