قازاقستاندىق اۋىر اتلەت كاتارداعى تۋرنيردە جەڭىمپاز اتاندى

نۇر-سۇلتان. قازاقپارات - دوحادا اۋىر اتلەتيكادان ءوتىپ جاتقان كاتار كۋبوگى جارىسىندا قازاقستان قۇراماسى العاشقى مەدالدى جەڭىپ الدى، دەپ حابارلايدى قازاقپارات ءتىلشىسى.

ۇلتتىق وليمپيادا كوميتەتى ءمالىم ەتكەنىندەي، بۇل تۋرنير ليتسەنزيالىق بولىپ تابىلادى.

يگور سون 61 كەلىگە دەيىن سالماقتا ۇزدىك ناتيجە كورسەتتى.

ول قوسسايىس قورىتىندىسىندا 278 كەلى (124+154) كوتەرىپ، چەمپيون اتاندى.

تۇرىكمەنستاندىق سەييتجان ميرزايەۆ (270 كەلى) ەكىنشى، يتاليالىق رۋي داۆيدە (270 كەلى) ءۇشىنشى ورىنعا يە بولدى.

ي. سون بيىلعى الەم چەمپيوناتىندا 55 كەلىگە دەيىنگى سالماقتا ونەر كورسەتىپ، 266 كەلى ناتيجەمەن كۇمىس جۇلدەگەر اتانعان بولاتىن.

قازاقستان اۋىر اتلەتيكا فەدەراتسياسىنان الىنعان مالىمەتكە قاراعاندا، كاتار كۋبوگىندا ي. سوننان باسقا تاعى التى قازاقستاندىق اتلەت باسەكەگە تۇسەدى. ولار - دەنيس ۋلانوۆ پەن نيجات راحيموۆ (ەكەۋى دە - 81 كەلى)، يليا يلين (96 كەلى)، يبراگيم بەرسانوۆ (109 كەلى)، ەكاتەرينا بىكوۆا (76 كەلى) جانە راۋشان مەشىتحانوۆا (87 كەلى).

بۇل - اۋىر اتلەتتەر ءۇشىن بيىلعى سوڭعى تۋرنير.

ايتا كەتەيىك، دوپينگكە بايلانىستى بەلگىلى وقيعالاردان كەيىن قازاقستان قۇراماسى توكيو وليمپياداسىنا ەكى-اق (بىرەۋى ەرلەر، ەكىنشىسى ايەلدەر اراسىندا) جولداماعا يە بولا الادى. ياعني قۇرامادان ەڭ ۇزدىك قوس اتلەتكە عانا مۇمكىندىك بەرىلەدى.