تۇركىستان وبلىسىندا جۇرەك اقاۋىمەن تۋعان ءسابي قۇتقارىلدى

سانكت- پەتەربۋرگ. قازاقپارات –  تۇركىستان وبلىسىنىڭ دارىگەرلەرى جۇرەك اقاۋىمەن تۋعان ءسابيدى امان الىپ قالدى. بەس ساعاتقا سوزىلعان كۇردەلى وتادان كەيىن ءسابيدىڭ كەۋدە قۋىسى جابىلىپ، كارديوحيرۋرگيا بولىمىنە اۋىستىرىلعان، دەپ حابارلايدى قازاقپارات.

وبلىستىق قوعامدىق دەنساۋلىق ساقتاۋ باسقارماسىنىڭ مالىمەتىنشە، ناۋقاس نارەستە دۇنيەگە كەلگەننەن ءتورت كۇننەن كەيىن جاعدايى ناشارلاعان. جۇرەگىنىڭ قولقا دوعاسىنىڭ اقاۋىمەن دۇنيەگە كەلگەن سوفيانى دارىگەرلەر شۇعىل تۇردە سانيتارلىق اۆياتسيامەن شىمكەنت قالالىق پەرزەنتحاناسىنان تۇركىستان وبلىستىق بالالار اۋرۋحاناسىنا جەتكىزگەن.

دەر كەزىندە جاسالعان وتانىڭ ارقاسىندا ءسابيدىڭ دەنساۋلىعى جاقسارىپ، حيرۋرگيا بولىمشەسىنە اۋىستىرىلعان. ماماندار جۇرەكتىڭ قولقا دوعاسىنىڭ اقاۋىنا وتا جاسالماعان جاعدايدا، بالا قان اينالىمى جۇرمەي ەكى اپتاعا جەتەر- جەتپەس باقيلىق بولاتىنىن ايتادى.

ايتا كەتەيىك، تۇركىستان وبلىستىق بالالار اۋرۋحاناسىنىڭ كارديوحيرۋرگيا بولىمشەسىندە جىل سايىن سابيلەردىڭ اشىق جۇرەگىندە 250 وپەراتسيا جاسالىنادى. ولاردىڭ 40 پايىزى جۇرەك اقاۋى بار جاڭا تۋعان نارەستەلەر. تۇركىستان وبلىستىق بالالار اۋرۋحاناسىندا دارىگەرلەردىڭ بىلىكتىلىگىن ارتتىرۋ ماقساتىندا ءتۇرلى وقىتۋ شارالارى ۇيىمداستىرىلىپ وتىرادى.

 باس دارىگەرى گاۋحار ۇكىبايەۆانىڭ ايتۋىنشا، اۋرۋحانادا كۇنى كەشە ترياج جۇيەسى ەنگىزىلىپ، شۇعىل مەديتسينالىق كومەك تاقىرىبىندا قىزمەتكەرلەرىنە ارنايى ءدارىس وتكىزىلگەن. بالالارعا مەديتسينالىق قىزمەت كورسەتۋدىڭ ساپاسى مەن قول جەتىمدىلىگىن جاقسارتۋ ماقساتىندا قابىلداۋ بولمەسىن تالاپقا ساي قايتا جاڭعىرتۋ قاراستىرىلىپ وتىر.