ماڭعىستاۋدا سۋ تاپشىلىعى ماسەلەسىن شەشۋ كوزدەلىپ وتىر

اقتاۋ. قازاقپارات - ماڭعىستاۋ وڭىرىندە سۋ ماسەلەسى وزەكتى. سۋ تاپشىلىعى كۇنىنە 35 مىڭ تەكشە مەتردى قۇرايدى، دەپ حابارلايدى قازاقپارات ءتىلشىسى.

وسى ماسەلەنى شەشۋ ماقساتىندا قازىرگى تاڭدا «كاسپيي» سۋ تۇشىتۋ زاۋىتىنىڭ تاۋلىكتىك قۋاتىن 40 مىڭعا دەيىن كەڭەيتۋ جۇمىستارى باستالدى. جوباعا بولىنگەن قاراجات قۇنى 10,6 ميلليارد تەڭگەنى قۇراپ وتىر. ونىڭ ىشىندە رەسپۋبليكالىق قازىنادان 1 ميلليارد تەڭگە قارالعان.

جالپى، قازىر 5 اۋداندا دا ءالى سۋ قۇبىرلارى تارتىلماعان ەلدى مەكەندەر بار. سونىڭ ىشىندە كەلەسى جىلدان باستاپ جەتىباي، شەتپە، جارمىش، باسقۇدىق، قىزىلتوبە، ماڭعىستاۋ-5، اقشۇقىر، سايىن شاپاعاتوۆ اۋىلدارى مەن جاڭاوزەن قالاسى مەرەي شاعىن اۋدانىندا سۋمەن قامتۋدىڭ 27 جوباسى ىسكە اسىرىلماق.

ەگەر اتالعان جوبالار ساتىمەن جۇزەگە اسسا، ەلدى مەكەندەردى ورتالىقتاندىرىلعان اۋىز سۋمەن قامتۋ كورسەتكىشى 75- تەن 79- پايىزعا ارتادى دەپ كۇتىلۋدە.

اۆتور: ءلايلىم ءالىم