پرەزيدەنت شەتەل جۇمىس كۇشى تارتىلعان كاسىپورىندارعا قاتىستى پىكىر ءبىلدىردى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ شەتەل جۇمىس كۇشى تارتىلعان كاسىپورىندارعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«مەن شەتەلدىك جۇمىس بەرۋشىلەر تاراپىنان ءبىزدىڭ ازاماتتاردى كەمسىتۋىنە جول بەرىلمەۋى كەرەكتىگى تۋراسىندا ۇدايى ايتىپ كەلەمىن. سىزدەر دە بۇل ماسەلەنى كوتەرگەنسىزدەر. سوندىقتان مەنىڭ تاپسىرماممەن وتكەن ايدا شەتەلدىك جۇمىس كۇشىن تارتىپ وتىرعان كاسىپورىنداردا ەڭبەك جانە كوشى- قون زاڭناماسىنىڭ ساقتالۋى بويىنشا تەكسەرۋ جۇرگىزىلدى. وسى ۋاقىتتا 95 كومپانيا ينسپەكتسيالىق تەكسەرۋدەن ءوتىپ، 930 زاڭبۇزۋشىلىق فاكتىلەرى انىقتالدى»، - دەدى مەملەكەت باسشىسى ۇلتتىق قوعامدىق سەنىم كەڭەسىنىڭ وتىرىسىندا.

وسى ورايدا شەتەلدىك قىزمەتكەرلەردىڭ جۇمىسى بەرىلگەن رۇقساتناماعا سايكەس كەلمەۋى، اتقارىپ وتىرعان لاۋازىمى مەن ءبىلىمىنىڭ سايكەسسىزدىگى ءجيى كەزدەسكەن.

«جاعدايدى تالداۋ مەن قۇزىرەتتى ورگانداردىڭ تەكسەرۋى نەگىزىندە جانە ۇلتتىق كەڭەس مۇشەلەرىنىڭ ۇسىنىستارىن ەسكەرە وتىرىپ، ەڭبەك جانە حالىقتى الەۋمەتتىك قورعاۋ مينيسترلىگى ءبىرقاتار وزگەرىستەردى ازىرلەدى»، - دەدى پرەزيدەنت.

بىرىنشىدەن، 2020 -جىلعا شەتەلدىك جۇمىس كۇشىن تارتۋ كۆوتاسى ايتارلىقتاي قىسقارادى. قىسقارتۋ 40 پايىز شاماسىندا بولادى. 2019 -جىلى 49 مىڭ بولسا، 2020 -جىلى 29 مىڭ بولادى.

ەكىنشىدەن، جۇمىسشىلار سانى 250 ادامنان اساتىن، 30-دان ارتىق شەتەلدىك جۇمىسشى تارتقان بارلىق كاسىپورىندار تۇراقتى تەكسەرۋمەن قامتىلادى. ەندى ەڭبەك مينيسترلىگى كەز كەلگەن زاڭبۇزۋشىلىقتارعا جەدەل ارەكەت ەتە الادى. وسىلايشا، ماسەلەنىڭ جىلدان- جىلعا قوردالانۋىنا جول بەرىلمەيدى.

«ۇشىنشىدەن، شەتەلدىك جۇمىس كۇشىنە كۆوتا تاعايىنداۋ ەرەجەسى جانە رۇقسات بەرۋ ەرەجەسى قايتا قارالادى. ءتورتىنشى ساناتتاعى جۇمىسشى ماماندىعى بويىنشا شەتەلدىك جۇمىسشىنىڭ سانىن قىسقارتۋ ماسەلەسى دە قايتا قارالادى. سونداي- اق، مامانداردىڭ جەرگىلىكتى قۇرامىنا قاتىستى تالاپتار كۇشەيتىلەدى»، - دەدى قاسىم-جومارت توقايەۆ.

اۆتور رۋسلان عابباسوۆ