ادامدار اينالاداعى تولعان اگرەسسيادان، تەكە-تىرەستەن شارشادى - مەملەكەت باسشىسى

نۇر- سۇلتان. قازاقپارات - بۇگىندە ادامدار اينالاداعى تولعان اگرەسسيادان، تەكە-تىرەستەن شارشادى.

بۇل تۋرالى بۇگىن ۇلتتىق قوعامدىق سەنىم كەڭەسىنىڭ 2-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«بيلىك مەملەكەتىمىزدىڭ دامۋىنا، بولاشاعىنا پايداسى تيەتىن كەز كەلگەن وڭ وزگەرىستەرگە دايىن. ۇلتتىق كەڭەس وسىنداي جۇمىستا ماڭىزدى ءرول اتقارۋى كەرەك. وزدەرىڭىز كورىپ وتىرسىزدار، بۇل جەردە ەل مەن جەر تاعدىرىنا قاتىستى اسا ماڭىزدى، كۇردەلى ماسەلەلەر اشىق تالقىلانادى. كەڭەستە كوتەرىلگەن تۇيتكىلدى ماسەلەلەر قوعامدا دا قىزۋ پىكىرتالاسقا ءتۇسىپ جاتىر»، - دەدى قاسىم-جومات توقايەۆ.

ق ر پرەزيدەنتىنىڭ پايىمىنشا، مۇنىڭ ءبارى حالقىمىزدىڭ ساياسي ءارى قۇقىقتىق مادەنيەتىنىڭ ارتقانىن ايقىن كورسەتەدى.

«ءبىراق، ماسەلە تەك ساياساتتا عانا ەمەس. كوپ نارسە ادامدار اراسىندا، وتباسىندا، ياعني كۇندەلىكتى ومىردە ۇستاناتىن قاراپايىم قۇندىلىقتارعا بايلانىستى. شىندىعىن ايتقاندا، بۇگىندە ادامدار اينالاداعى تولعان اگرەسسيادان، تەكە-تىرەستەن شارشادى. سوندىقتان جاقسىلىقتى مولايتۋىمىز كەرەك. ىزگى نيەتتى بولۋدى ۇيرەنۋىمىز كەرەك. مەيىرىمدى، اقىلدى، بەكزات بولۋ ورنىقتى دامۋ مەن رۋحاني ورلەۋدىڭ قوزعاۋشى كۇشى بولۋى ءتيىس. وسى ارقىلى ءبىز ءادىل قوعام مەن وركەنيەتتى مەملەكەت قۇرا الامىز. ماقساتتارىمىزعا ءبىر حالىق بولىپ، ىنتىماق پەن كەلىسىمنىڭ ارقاسىندا جەتەمىز دەپ سەنەمىن»، - دەدى مەملەكەت باسشىسى.

اۆتور: مارلان جيەمباي