پرەزيدەنت: ميتينگتەر - جاۋاپكەرشىلىك ەكەنىن ءتۇسىنۋ كەرەك

نۇر-سۇلتان. قازاقپارات - ميتينگتەر قۇقىق قانا ەمەس، سونىمەن قاتار جاۋاپكەرشىلىك ەكەنىن ءتۇسىنۋ كەرەك.

بۇگىن ۇلتتىق قوعامدىق سەنىم كەڭەسىنىڭ 2-وتىرىسىندا ق ر پرەزيدەنتى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«ميتينگتەردى ۇيىمداستىرۋدىڭ ەسكەرتۋ پرينسيپىن ەنگىزۋگە كىرىسۋ كەرەك. ميتينگتەردى وتكىزۋگە بولادى، ەگەر دە ولار زاڭدى، قوعامدىق ءتارتىپتى بۇزباسا جانە ازاماتتاردىڭ تىنىشتىعىنا كەدەرگى كەلتىرمەسە. بۇل مەنىڭ تۇبەگەيلى ۇستانىمىم»، - دەدى ق. توقايەۆ.

وسى ورايدا پرەزيدەنت قوعامدىق ساناعا ميتينگتەر مادەنيەتىن داعدىلاندىرۋ ۋاقىتى جەتكەنىن اتاپ ءوتتى. قوعام مەن مەملەكەتكە پوزيتسيانى جاريا تۇردە ءبىلدىرۋ ماسەلەسىنە ءتيىستى دەڭگەيدە نازار اۋدارۋ كەرەك.

«ميتينگتەر قۇقىق قانا ەمەس، سونىمەن قاتار جاۋاپكەرشىلىك ەكەنىن ءتۇسىنۋ كەرەك»، - دەپ قاداپ ايتتى ق. توقايەۆ.

مەملەكەت باسشىسىنىڭ سوزىنە قاراعاندا، پرەزيدەنت جولداۋىن جۇزەگە اسىرۋ بويىنشا جوسپاردى ورىنداۋ اياسىندا «بەيبىت جيىندار تۋرالى» زاڭ جوباسى ازىرلەندى. وندا بەيبىت جيىنداردىڭ بارلىق فورمالارى ناقتى ايقىندالىپ، ارنايى ورىنداردى انىقتاۋ بويىنشا ءماسليحاتتار قۇزىرەتى بەكىتىلەدى.

سونىمەن قاتار، «ۇيىمداستىرۋشىنىڭ مارتەبەسى»، «قاتىسۋشى مەن بايقاۋشى مارتەبەسى» تۇسىنىكتەرى، ولاردىڭ قۇقىقتارى مەن مىندەتتەرى قامتىلادى.

«بۇل تۇرعىدا قولدانىستاعى زاڭعا وزگەرىستەر ەمەس، كونسەپتۋالدى جاڭا زاڭ تۋرالى ايتىلىپ وتىر. بۇل قۇجات بەيبىت جيىنداردىڭ بارلىق فورمالارىن ۇيىمداستىرۋ مەن وتكىزۋ ماسەلەلەرىن رەگلامەنتتەيدى. ۇكىمەت پارلامەنت قاراۋىنا زاڭ جوباسىن ەنگىزۋى كەرەك»، - دەدى مەملەكەت باسشىسى.

اۆتور: رۋسلان عابباسوۆ