لاتىن الىپبيىنە كوشۋدە ءبىز قازاق ءتىلىن رەفورمالايمىز - قاسىم-جومارت توقايەۆ
بۇل تۋرالى بۇگىن ۇلتتىق قوعامدىق سەنىم كەڭەسىنىڭ 2-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«لاتىن گرافيكاسىنداعى الىپبيگە كوشۋ ماسەلەسىندە اسىعىستىق تانىتۋعا بولمايدى. تىڭعىلىقتى، تەكسەرىلگەن ۇستانىم تالاپ ەتىلەدى. جان-جاقتى ساراپتاۋ جانە جاڭا ءالىپبيدىڭ بارلىق اسپەكتىلەرىن ازىرلەۋ قاجەت. لاتىن ءالىپبيىنىڭ ۇسىنىلعان ءۇش نۇسقاسى دا جەتىلدىرىلمەگەن بولىپ شىقتى. سوندىقتان بۇل پروبلەمادا شىنايى عىلىمي ءادىس كەرەك جانە جەڭىلدەتۋگە بولمايدى»، - دەدى مەملەكەت باسشىسى.
ق ر پرەزيدەنتى كيريليتسانى لاتىنعا جاي عانا اۋىستىرۋ توڭىرەگىندە ءسوز بولىپ وتىرماعاندىعىن ايتتى.
«قازاق تىلىنە رەفورما، ءتىپتى قاجەت دەسەڭىزدەر ءتىلىمىزدى جاڭعىرتۋ قاجەت. عالىمدارىمىزدىڭ سالماقتى پىكىرلەرىن كۇتەمىز. تاعى دا قايتالاپ ايتامىن، ءبىز ناقتى قازاق ءتىلىن رەفورمالايمىز. مۇنداي ۇلتىمىز ءۇشىن تاعدىرشەشتى ماسەلەدە ناۋقانشىلدىققا جانە جەڭىلتەكتىككە جول بەرۋگە بولمايدى»، - دەدى قاسىم-جومارت توقايەۆ.
اۆتور: مارلان جيەمباي
