ەرلان سايروۆ: قازاقستان جاڭا ساياسي داۋىرگە ەنىپ كەلە جاتىر

نۇر-سۇلتان. قازاقپارات - بەلگىلى ساياساتتانۋشى ەرلان سايروۆ ۇلتتىق قوعامدىق سەنىم كەڭەسىنىڭ ەكىنشى وتىرىسىندا كوتەرىلگەن ۇسىنىستارعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىزدىڭ ەلىمىزدەگى ساياسي ترانسفورماتسيا جانە الەۋمەتتىك مودەرنيزاتسيا ماسەلەسى ءىس جۇزىنە اسىپ جاتىر. ساياسي ماسەلەلەرگە كەلەتىن بولساق، پارتيا تۋرالى زاڭعا وزگەرىستەر ەنگىزىلەدى. جاڭا سيپاتتاعى ميتينگ تۋرالى زاڭ قابىلدانادى. سونىمەن بىرگە، پارلامەنت تۋرالى زاڭعا پارلامەنتتىك وپپوزيتسيا جونىندەگى جاڭا نورما ەنگىزىلەدى. بۇل ماسەلەنىڭ بارلىعى ءبىزدىڭ ەلىمىزدەگى ادام يندەكسىنىڭ دامۋىنىڭ، سونىمەن بىرگە ادامداردىڭ بوستاندىعىنىڭ ارتۋىنا الىپ كەلەتىن ناقتى قادامدار»، - دەدى ساياساتتانۋشى قازاقپارات تىلشىسىنە.

ساياسات تانۋشىنىڭ ايتۋىنشا، بۇگىنگى ناقتى قادامدار - قازاقستانداعى قوعام مەن مەملەكەتتىڭ، حالىق پەن بيلىكتىڭ اراسىنداعى قارىم-قاتىناستىڭ جاڭا تۇرپاتقا، ادامگەرشىلىكتى سىيلاۋ، ادامنىڭ ەركىندىگىن، بوستاندىعىن سىيلاۋ تۇرپاتىنا ەنگەندىگىن كورسەتەدى.

«بۇل - بۇگىنگى تاڭداعى قازاقستاننىڭ جاڭا ساياسي داۋىرگە كىرىپ كەلە جاتقانىنىڭ ناقتى بەلگىسى»، - دەدى ول.

ەسكە سالا كەتسەك، بۇگىن ەلوردادا پرەزيدەنتى قاسىم-جومارت توقايەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ ەكىنشى وتىرىسى ءوتتى. وتىرىستا مەملەكەت باسشىسى قازاقستانعا «پارلامەنتتىك وپپوزيتسيا ينستيتۋتى قاجەت» ەكەنىن ايتىپ ءوتتى.

اۆتور: ايان بەكەن ۇلى