اقشا جىمقىرۋدىڭ سان ءتۇرلى تاسىلدەرى جويىلار ەمەس – ق ر پرەزيدەنتى

نۇر-سۇلتان. قازاقپارات - زاڭسىز اينالىمعا قارسى كۇرەس شارالارىن كۇشەيتىپ قانا قويماي، بۇل ىستە تىڭ سەرپىلىس جاساۋ كەرەك.

بۇل تۋرالى بۇگىن ۇلتتىق قوعامدىق سەنىم كەڭەسىنىڭ 2-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«مەملەكەت تاراپىنان قابىلدانعان شارالارعا قاراماستان كولەڭكەلى ەكونوميكا ماسەلەسى شەشىمىن تاپپاي وتىر. جالعان فيرمالار اشىپ، اقشا جىمقىرۋدىڭ سان ءتۇرلى تاسىلدەرى جويىلار ەمەس. شىن مانىندە بۇعان قارسى ءتيىمدى كۇرەسە الماي كەلەمىز»، - دەدى ق ر پرەزيدەنتى.

مەملەكەت باسشىسى قۇزىرلى ورگاندار كوبىنە ءتيىستى شارالاردى دەر كەزىندە قولدانباي وتىرعاندىعىن ايتتى.

«سونىڭ سالدارىنان كىناسىز كاسىپكەرلەر دە زارداپ شەگەدى. ال ناعىز ۇيىمداستىرۋشىلار جاۋاپكەرشىلىكتەن قۇتىلىپ كەتەدى. سوندىقتان زاڭسىز اينالىمعا قارسى كۇرەس شارالارىن كۇشەيتىپ قانا قويماي، بۇل ىستە تىڭ سەرپىلىس جاساۋ كەرەك. كەڭەس مۇشەلەرى وسى جۇمىسقا بيزنەس وكىلدەرىن جۇمىلدىرۋدى ۇسىندى. وزدەرىنىڭ ىقتيمال كونتراگەنتتەرىن باعالاۋ جانە تەكسەرۋ ءۇشىن ولارعا ءتيىمدى قۇرال بەرۋ قاجەتتىگى ايتىلدى»، - دەدى ق. توقايەۆ.

اۆتور: مارلان جيەمباي